पुणे – पुणे शहरातील दुय्यम निबंधक कार्यालयांमध्ये १९८५ ते २००१ या कालावधीत नोंदणी पूर्ण झालेले, परंतु नागरिकांनी अद्याप न नेलेले सुमारे ७५ हजार दस्त आता संबंधित पक्षकारांना परत दिले जाणार आहेत. या महत्त्वाकांक्षी मोहिमेचा शुभारंभ महसूलमंत्री चंद्रशेखर बावनकुळे यांच्या हस्ते बालेवाडी येथे आयोजित महसूल परिषदेत झाला. या सोहळ्यास महसूल विभागाचे अपर मुख्य सचिव राजेश कुमार, नोंदणी महानिरीक्षक रवींद्र बिनवडे आणि पुणे शहर सह जिल्हा निबंधक संतोष हिंगाणे यांच्यासह वरिष्ठ अधिकारी उपस्थित होते.

पुणे शहरातील हवेली क्रमांक १ ते ९ या दुय्यम निबंधक कार्यालयांमध्ये १९८५ ते २००१ दरम्यान सुमारे दीड लाख मूळ दस्तांची नोंदणी पूर्ण झाली होती. मात्र, त्या वेळी संबंधित पक्षकारांनी ही कागदपत्रे घेतली नाहीत. आता जेव्हा नागरिक ही दस्त मागण्यासाठी कार्यालयात येतात, तेव्हा त्यांना वेळेवर दस्त मिळत नाहीत. परिणामी, त्यांना वारंवार कार्यालयाचे उंबरठे झिजवावे लागतात, ज्यामुळे त्यांची महत्त्वाची कामे रखडतात आणि मनस्ताप होतो. यातून अनेक तक्रारीही समोर येत आहेत. या दस्तांचे संरक्षण करणेही विभागासाठी जोखमीचे ठरत आहे, कारण यासाठी मोठ्या प्रमाणात मनुष्यबळ आणि जागेचा खर्च होतो.

या समस्येवर तोडगा काढण्यासाठी सह जिल्हा निबंधक संतोष हिंगाणे यांनी पुढाकार घेतला. त्यांनी हवेली क्रमांक १ ते ९ या कार्यालयांतील सर्व जुन्या दस्तांची सखोल पडताळणी सुरू केली. यातून परत देता येण्याजोग्या दस्तांची यादी तयार करण्यात आली. पहिल्या टप्प्यात ७५ हजार दस्तांची यादी पूर्ण झाली असून, ही कागदपत्रे आता नागरिकांना परत करण्यासाठी सज्ज आहेत.

दस्तांची यादी कुठे पाहाल?

नोंदणी व मुद्रांक विभागाच्या संकेतस्थळावर “नवीन” या सदरात या दस्तांची यादी प्रसिद्ध करण्यात आली आहे. यासोबतच, पुणे शहरातील सर्व दुय्यम निबंधक कार्यालयांचे अद्ययावत पत्ते आणि गुगल लोकेशनचे QR कोडही संकेतस्थळावर उपलब्ध करून देण्यात आले आहेत. यादीत नमूद असलेल्या दस्तांचे पक्षकार यांनी संबंधित कार्यालयात मूळ पावती आणि ओळखपत्र दाखवून आपले दस्त घ्यावेत, असे आवाहन संतोष हिंगाणे यांनी केले आहे. या उपक्रमामुळे नागरिकांचा त्रास कमी होईल आणि विभागावरील भारही हलका होईल, अशी अपेक्षा व्यक्त केली जात आहे.