Satara: ज्येष्ठ नेते प्रल्हादराव साळुंखे- पाटील हे माझ्यासाठी पितृतुल्य आहेत. राजकीय जीवनात त्यांनी कायमच वडीलधाऱ्या व्यक्तीप्रमाणे मार्गदर्शन केले आहे. जनतेच्या प्रश्नांची जाण ठेवून ते सोडवण्यासाठी सातत्याने प्रयत्न करणारे नेतृत्व म्हणून त्यांची ओळख आहे, असे गौरवोद्गार खासदार उदयनराजे भोसले यांनी काढले.

सुरवडी (ता. फलटण) येथे प्रल्हादराव साळुंखे- पाटील यांच्या अमृत महोत्सवानिमित्त आयोजित कार्यक्रमाच्या अध्यक्षस्थानावरुन उदयनराजे भोसले बोलत होते. यावेळी ग्रामीण विकास मंत्री जयकुमार गोरे, माजी खासदार रणजितसिंह नाईक निंबाळकर, माजी आमदार शहाजीबापू पाटील, आ. सचिन पाटील उपस्थित होते. खा. उदयनराजे म्हणाले, ‘‘प्रल्हादराव साळुंखे-पाटील यांनी कोणतेही संविधानिक पद भूषवले नसतानाही सर्वसामान्य जनतेची कामे चिकाटीने व तळमळीने केली.

समाजातील सर्व स्तरांतील लोकांशी त्यांनी जिव्हाळ्याचे संबंध निर्माण केले. तालुक्यातील तसेच जिल्ह्यातील अनेक आमदार, खासदार आणि विविध पदांवर कार्यरत असलेल्या व्यक्तींना त्यांनी वेळोवेळी मार्गदर्शन केले. पद नसतानाही जनतेच्या प्रश्नांसाठी पुढाकार घेणे ही त्यांची मोठी जमेची बाजू आहे.” ना. जयकुमार गोरे म्हणाले, “प्रल्हादराव साळुंखे- पाटील हे केवळ फलटण तालुक्यातील ज्येष्ठ नेते नसून माझ्यासाठी वडीलधाऱ्या व्यक्तीच्या भूमिकेत राहिले आहेत. त्यांच्या अनुभवातून व मार्गदर्शनातून मला तसेच माजी खासदार रणजितसिंह नाईक निंबाळकर यांना अनेकदा योग्य दिशा मिळाली.”

रणजितसिंह नाईक निंबाळकर म्हणाले, “प्रल्हादराव साळुंखे- पाटील यांनी आयुष्यभर माणसे जोडण्याचे काम केले. आमच्या कुटुंबासाठी कै. हिंदुराव नाईक निंबाळकर यांच्यानंतर वडीलकीचा आधार कोणी दिला असेल, तर तो तात्यांनी दिला. फलटण तालुक्यातील विकासकामांबाबत त्यांनी कायम योग्य मार्गदर्शन केले.”

शहाजीबापू पाटील यांनीही प्रल्हादराव साळुंखे-पाटील यांच्या सामाजिक, राजकीय, शैक्षणिक व सहकार क्षेत्रातील योगदानाचा गौरव केला. कार्यकत्यांची ताकद हीच आपल्या राजकीय जीवनाची ऊर्जा असल्याचे प्रल्हादराव साळुंखे- पाटील यांनी सत्काराला उत्तर देताना सांगितले. गेली तीस वर्षे केवळ कार्यकर्त्यांच्या बळावर सत्तेच्या विरोधातील प्रवाहात ठामपणे राहिलो. यापुढेही कार्यकर्त्यांसाठी सर्व क्षेत्रांत तळमळीने व ताकदीने उभे राहणार असल्याचे त्यांनी सांगितले.

कार्यक्रमास फलटण पंचायत समितीच्या सभापती शिवांजली भोसले, फलटणचे नगराध्यक्ष शमशेरसिंह नाईक निंबाळकर, माजी आमदार मदनदादा भोसले, शिवरूपराजे खर्डेकर, सुरवडीच्या सरपंच शरयू साळुंखे- पाटील उपस्थित होते. आ. सचिन पाटील यांनी प्रास्ताविक केले. पंचायत समिती सदस्य धनंजय साळुंखे- पाटील यांनी आभार मानले.

तर मीही आमदार होईन…

फलटणमध्ये सत्तांतर घडवून विधानसभा मतदारसंघ मिळवला आहे. सध्या फलटण-कोरेगाव मतदारसंघ राखीव असल्याने सचिन पाटील आमदार आहेत. भविष्यातही मतदारसंघ राखीव राहिला तर सचिन पाटील पुन्हा आमदार होतील. मात्र, मतदारसंघ खुला झाला तर मीही आमदार होऊ शकतो, अशी मिश्कील टिपणी प्रल्हादराव साळुंखे- पाटील यांनी केली.