BRT Route Potholes – महापालिकेच्या पाणीपुरवठा विभागामार्फत निगडी ते दापोडीपर्यंत बीआरटी मार्गातून जलवाहिनी टाकण्याचे काम सुरु आहे. हे काम करणाऱ्या ठेकेदार कंपनीने रस्ता दुरुस्ती करताना निकृष्ट काम गेल्यामुळे अनेक ठिकाणी बीआरटी मार्गात मोठ मोठे खड्डे पडले आहेत. या प्रकरणी अखेर महापालिकेने संबधित ठेकेदाराला नोटीस बजावली आहे. खड्डे तातडीने बुजवावेत, अन्यथा कारवाई करण्याचा इशारा दिला आहे.

महापालिकेच्या पाणीपुरवठा विभागामार्फत निगडी सेक्टर क्रमांक २३ येथील जलशुद्धीकरण केंद्रापासून मुंबई-पुणे जुन्या महामार्गावरून दापोडीपर्यंत १०००, ८०० आणि ६०० मि.मी. व्यासाच्या जलवाहिन्या टाकण्याचे काम सुरू आहे. या प्रकल्पांतर्गत अनेक ठिकाणी रस्ता खोदण्यात आला असून काही भागात जलवाहिनी टाकून पुन्हा रस्ता दुरुस्ती करण्यात आला. हे काम पूर्णपणे बीआरटी मार्गातून करण्यात आले.

जलवाहिनी टाकल्यानंतर झालेले दुरुस्तीचे काम निकृष्ट असल्यामुळे अनेक ठिकाणी खड्डे पडले आहेत. अवघ्या काही दिवसांत या रस्त्यावर मोठे खड्डे पडले असून ते धोकादायक आहेत. या प्रकरणी पाणीपुरवठा विभागाने गुडविल कन्स्ट्रक्शन या ठेकेदाराला नोटीस बजावली आहे. महापालिकेने यापूर्वी संयुक्त पाहणी, लेखी पत्रव्यवहार, ई-मेल, बैठका तसेच तोंडी सूचनांद्वारे संबंधित ठेकेदाराला वारंवार सूचना दिल्या होत्या.

मात्र, त्यानंतरही कामाची गती अत्यंत संथ व असमाधानकारक असल्याचे नोटिशीत नमूद करण्यात केले आहे. दापोडी ते निगडीदरम्यानचा संपूर्ण रस्ता तातडीने दुरुस्त करून वाहतुकीस सुरळीत करण्याचे आदेश दिले आहेत. तसेच अपूर्ण कामांमुळे भविष्यात कोणताही अपघात किंवा अनुचित घटना घडल्यास त्याची संपूर्ण जबाबदारी संबंधित ठेकेदाराची राहील, असे स्पष्ट करत कामात आणखी विलंब झाल्यास संबंधित विभागामार्फत दंडात्मक कारवाई करण्यात येईल, असा थेट इशाराही देण्यात आला आहे.

अपघाताचा धोका, बस वाहतूक बंद करण्याची वेळ
बीआरटी मार्गात पडलेल्या मोठ मोठ्या खड्ड्यामुळे बसचालकांना व प्रवाश्यांना त्रास सहन करावा लागत आहे. तसेच, खड्डयांमुळे अपघात होण्याचा धोका आहे. खड्डे असलेल्या ठिकाणी दुरुस्ती होईपर्यंत बीआरटी मार्गातून बससेवा बंद ठेवण्याचे निर्देश दिल्याचे महापालिका अधिकाऱ्यांनी केली.

“दापोडी ते निगडी मार्गावरील खड्डे तातडीने बुजवून रस्ता वाहतुकीस योग्य स्थितीत आणावा, अन्यथा दंडात्मक कारवाईला सामोरे जावे लागेल, अशी नोटीस गुडविल कन्स्ट्रक्शन या ठेकेदाराला दिलेली आहे. त्यांच्याकडून रस्ता दुरुस्ती करून घेतली जाईल.”
– अजय सुर्यवंशी, सहशहर अभियंता, पिंपरी-चिंचवड महापालिका