प्रभात वृत्तसेवा पिंपरी – पोस्ट ऑफिसच्या फेऱ्या, लांबलचक रांगा आणि वेळखाऊ कागदोपत्री प्रक्रिया यांना आता पूर्णविराम मिळाला आहे. भारतीय डाक विभागाने सुरू केलेल्या ‘डाकसेवा 2.0’ या अत्याधुनिक मोबाइल अॅपमुळे टपाल खात्याच्या जवळपास सर्व प्रमुख सेवा थेट स्मार्टफोनवर उपलब्ध झाल्या आहेत. याचा मोठा फायदा पिंपरी-चिंचवड शहरातील नागरिकांना होणार आहे. ग्राहकांच्या सोयीसाठी विकसित करण्यात आलेले हे अॅप सोपे, वेगवान आणि वापरण्यास सुलभ आहे. मराठीसह एकूण २३ भाषांमध्ये अॅप उपलब्ध असल्याने विविध भाषिक नागरिक सहजपणे सेवा घेऊ शकतात. अॅपच्या उजव्या वरच्या कोपऱ्यातून भाषा निवडण्याचा पर्याय देण्यात आला आहे. या अॅपच्या माध्यमातून स्पीड पोस्ट व पार्सल ट्रॅकिंगचे रिअल-टाईम अपडेट्स, ऑनलाईन मनी ऑर्डर, पोस्टल फी कॅल्क्युलेटर, विमा हप्ता भरणे, ग्राहक तक्रार नोंदणी व तक्रारीचा स्टेटस, तसेच पोस्ट ऑफिस बचत खात्याची माहिती व व्यवहार तपशील घरबसल्या पाहता येणार आहेत. त्यामुळे व्यवहारासाठी पोस्ट ऑफिसमध्ये प्रत्यक्ष जाण्याची गरज मोठ्या प्रमाणात कमी होणार आहे. पोस्ट ऑफिसमधील वाढत्या गर्दीमुळे नागरिकांना होणारा त्रास, तक्रारींमध्ये झालेली वाढ आणि जलद, डिजिटल सेवेची गरज लक्षात घेऊन हे अॅप विकसित करण्यात आले आहे. २४x७ उपलब्ध असलेल्या या सेवेमुळे वेळेची मोठी बचत होणार असून प्रवास, रांगा आणि कागदपत्रांचा त्रास संपणार आहे. भारतीय डाकच्या आधुनिकीकरणाचा हा महत्त्वाचा टप्पा मानला जात असून सेवा अधिक पारदर्शक, तंत्रज्ञानस्नेही आणि ग्राहकाभिमुख करण्याचा उद्देश यातून साध्य होणार आहे. पिंपरी-चिंचवडसह देशभरातील लाखो ग्राहकांना ‘डाकसेवा 2.0’ अॅपमुळे मोठा दिलासा मिळणार आहे. “पोस्टाचा कारभार दिवसेंदिवस अधिक गतीमान होत चालला आहे. पोस्टांची सर्व माहिती या ॲपवर मिळते. एखाद्याने रजिस्टर पत्र, मनी ऑर्डर पाठविले असेल तर ते कुठपर्यंत गेले आहे, याची माहिती या ॲपद्वारे मिळते. जास्तीत जास्त नागरिकांनी या सुविधांचा लाभा घ्यावा.” – काळुराम पारखी, जनसंपर्क अधिकारी, पिंपरी
