Metro : बाणेर-बालेवाडीत मेट्रो प्रवाशांना दिलासा; आठ ठिकाणी पार्क अँड राइड सुविधा
दुचाकी-चारचाकींसह ईव्ही चार्जिंगची सुविधाही

पिंपरी – मेट्रोने प्रवास करणाऱ्या नागरिकांना स्थानकांजवळ वाहन पार्किंगची सुविधा उपलब्ध व्हावी, यासाठी बाणेर-बालेवाडी परिसरातील आठ अॅमेनिटी स्पेसचे भूखंड वाहनतळासाठी उपलब्ध करून देण्याचा निर्णय घेण्यात आला आहे. त्यामुळे स्थानकांवरील मर्यादित पार्किंग सुविधेमुळे प्रवाशांची होणारी गैरसोय कमी होण्यास मदत होणार आहे.
या भूखंडांवर दुचाकी आणि चारचाकी वाहनांसाठी स्वतंत्र पार्किंग व्यवस्था करण्यात आली आहे. काही ठिकाणी इलेक्ट्रिक वाहनांसाठी (ईव्ही) चार्जिंग स्टेशनची सुविधाही विकसित करण्यात आली आहे.
मेट्रोच्या सुरुवातीच्या टप्प्यात २३ स्थानकांपैकी माण डेपो, बालेवाडी आणि शिवाजीनगर (जिल्हा न्यायालय) या तीन स्थानकांवरच पार्किंगसाठी जागा उपलब्ध होती. मात्र, बाणेर-बालेवाडी परिसरातील मेट्रो प्रवाशांची वाढती संख्या आणि पार्किंगची गरज लक्षात घेऊन महापालिकेने अतिरिक्त जागा उपलब्ध करून दिल्या आहेत. या जागा संबंधित मेट्रो स्थानकांपासून साधारण १०० ते ४०० मीटर अंतरावर आहेत.
बालेवाडी येथील अमर टेक पार्क (पीएमआर-११) येथे सुमारे ३० हजार चौरस फूट, तर बाणेर एबीझेड (पीएमआर-१४) येथे २१ हजार चौरस फूट जागेत वाहनतळ विकसित करण्यात आले आहे. या ठिकाणी दुचाकी आणि चारचाकी वाहनांसाठी स्वतंत्र पार्किंगची सोय आहे. काही पार्किंगच्या जागांवर पेव्हिंग ब्लॉक बसविण्यात आले असून, इलेक्ट्रिक वाहनांसाठी चार्जिंग स्टेशनची सुविधाही उपलब्ध करून देण्यात आली आहे.
माण डेपो, बालेवाडी स्टेडियम (फूड हबजवळ), एनआयसीएमएआर, रामनगर (के-स्क्वेअरजवळ), लक्ष्मीनगर, बालेवाडी फाटा आणि बाणेर गाव परिसरातील महापालिकेच्या भूखंडांचाही पार्किंगसाठी समावेश करण्यात आला आहे. स्थानक क्रमांक १, २, ४, ५, ९, १०, ११ आणि १२ येथे या सुविधांचे नियोजन करण्यात आले आहे.
मुळशी, पिरंगुट आणि घोटावडे परिसरातून पुण्याकडे येणाऱ्या प्रवाशांसाठी माण डेपो हे महत्त्वाचे ‘पार्क अँड राइड’ केंद्र ठरणार आहे. प्रवाशांना खासगी वाहनाने मेट्रो स्थानकापर्यंत येऊन तेथे वाहन पार्क करता येईल. पुढील प्रवास मेट्रोने करता येणार आहे. तसेच स्वारगेट, कोथरूड आणि पिंपरी-चिंचवड परिसरातून येणाऱ्या प्रवाशांना शिवाजीनगर दिवाणी न्यायालय स्थानकावरील पार्किंगचा लाभ घेता येईल. येथे मेट्रोच्या पहिल्या आणि दुसऱ्या मार्गिकेच्या इंटरचेंजची सुविधाही उपलब्ध आहे.
प्रशासनाच्या धोरणानुसार दुचाकीसाठी प्रतितास अंदाजे ८ ते १० रुपये, तर चारचाकीसाठी २० ते ३० रुपये पार्किंग शुल्क आकारले जाणार आहे. काही स्थानकांवर १५ रुपये नाममात्र शुल्कात हेल्मेट सुरक्षित ठेवण्याची सुविधाही उपलब्ध होणार आहे. त्यामुळे प्रवाशांना वाहनांच्या पार्किंगची सोय मिळण्यासोबतच सार्वजनिक वाहतुकीचा वापर अधिक सुलभ होण्यास मदत होणार आहे.
Indapur : १९७२ च्या दुष्काळापेक्षाही यंदाचे संकट मोठे





