Pune-Mumbai Expressway: खोपोली एक्झिटजवळ अर्ध्या तासात दोन अपघात; ट्रेलर चालकाचा जागीच मृत्यू, ट्रेलरच्या धडकेत ट्रक उलटला
तिघे जखमी, महामार्गावर वाहनांच्या लांबच लांब रांगा

खालापूर – पुणे-मुंबई द्रुतगती महामार्गावरील खोपोली एक्झिट परिसरात शनिवारी (दि. २१) सकाळी अवघ्या अर्ध्या तासाच्या अंतराने दोन अपघात घडले. सकाळी नऊच्या सुमारास पहिला अपघात झाला. त्यानंतर साडेनऊच्या सुमारास ट्रेलर आणि ट्रकमध्ये भीषण धडक झाली. या दुसऱ्या अपघातात ट्रेलर चालकाचा जागीच मृत्यू झाला. तर तिघे जखमी झाले.
सकाळी नऊच्या सुमारास खोपोली एक्झिटजवळ पहिला अपघात झाला. एका ट्रक चालकाचे वाहनावरील नियंत्रण सुटल्याने ट्रक एक्झिटवरील पुलाच्या उजव्या बाजूला जाऊन धडकला. या अपघातात चालक किरकोळ जखमी झाला. त्याला खोपोली नगरपालिका रुग्णालयात उपचारासाठी दाखल करण्यात आले.
या घटनेनंतर अवघ्या अर्ध्या तासात दुसरा भीषण अपघात झाला. ट्रेलर (टीजी-०८ एक्स ४२०९) पुण्याच्या बाजूकडून मुंबईच्या दिशेने जात होता. खोपोली बाह्यमार्गाजवळ चालकाचे वाहनावरील नियंत्रण सुटले आणि ट्रेलरने पुढे जाणाऱ्या ट्रकला (केए-५६-६५६४) जोरदार धडक दिली.
या धडकेनंतर ट्रक उलटला, तर ट्रेलरच्या केबिनचा अक्षरशः चेंदामेंदा झाला. या अपघातात ट्रेलर चालक सिद्धार्थ राजा (वय २७) याचा जागीच मृत्यू झाला. ट्रेलरचा क्लिनर फरशाद हुसैन खान (रा. उत्तर प्रदेश) हा गंभीर जखमी झाला. त्याला तातडीने नवी मुंबईतील कामोठे येथील एमजीएम रुग्णालयात उपचारासाठी दाखल करण्यात आले. डॉक्टरांनी त्याची प्रकृती गंभीर असल्याचे सांगितले.
अपघातग्रस्त ट्रकमधील चालक गुरुनाथ खापरे (वय ३८) आणि क्लिनर शरणाप्पा वस्ते (वय ३२) हे दोघे किरकोळ जखमी झाले. त्यांना खोपोली येथील डॉ. बाबासाहेब आंबेडकर रुग्णालयात दाखल करण्यात आले.
अपघाताची माहिती मिळताच महामार्गावरील मदत यंत्रणा आणि पोलिसांनी घटनास्थळी धाव घेतली. सलग दोन अपघातांमुळे महामार्गावरील वाहतुकीवर परिणाम झाला. दुसऱ्या अपघातात ट्रक उलटल्याने आणि ट्रेलर महामार्गावर अडकल्याने वाहनांच्या लांबच लांब रांगा लागल्या. अपघातग्रस्त ट्रक आणि ट्रेलर क्रेनच्या सहाय्याने बाजूला करण्याचे काम हाती घेण्यात आले. पोलिसांनी वाहतूक सुरळीत करण्यासाठी प्रयत्न केले.
अवजड वाहनांच्या अपघातांमुळे सुरक्षिततेचा प्रश्न ऐरणीवर
पुणे-मुंबई द्रुतगती महामार्गावर अवजड वाहनांचे अपघात वारंवार घडत असल्याने वाहनचालकांच्या सुरक्षिततेचा प्रश्न पुन्हा ऐरणीवर आला आहे. खोपोली एक्झिट परिसरात अवघ्या अर्ध्या तासात दोन अपघात घडल्याने या मार्गावरील वाहतूक सुरक्षेचा मुद्दा चर्चेत आला आहे.
वेगावर नियंत्रण, वाहनांची तांत्रिक तपासणी, चालकांची सतर्कता आणि वाहतूक नियमांचे काटेकोर पालन किती आवश्यक आहे, याची जाणीव या घटनांनी करून दिली. या अपघातांत एका तरुण चालकाचा मृत्यू झाला, तर अन्य चार जण जखमी झाले.





