दौंड: विविध कार्यकारी सोसायटीच्या नव्या बांधण्यात आलेल्या इमारतीच्या उद्घाटनाच्या कार्यक्रमासाठी दौंड शुगर लिंगाळी येथे  उपमुख्यमंत्री अजित पवार येणार आहेत. या कार्यक्रमाची पत्रिकेत दौंड तालुक्याचे आमदार राहुल कुल यांचे नाव टाकणे टाळल्याने पत्रिकेवरून वाद निर्माण झाला आहे. यामुळे आता मोठ्या राजकीय चर्चांना दौंड तालुक्यात उधाण आले आहे. यामुळे या पत्रिकेवर वाद होण्याची शक्यता वर्तवण्यात येत आहे.

दौंड विविध कार्यकारी सोसायटीच्या उद्घाटनासाठी उपमुख्यमंत्री अजित पवार आज दौंडमध्ये दुपारी दाखल होणार आहेत. मात्र, भाजपचे आमदार राहुल कुल यांचे नाव टाळल्याने नव्या राजकीय चर्चा तालुक्यात सुरू झाल्या आहेत. विशेष म्हणजे राष्ट्रवादी काँग्रेस शरद पवार गटाचे पराभूत उमेदवार रमेश थोरात यांचे या कार्यक्रम पत्रिकेवर नाव टाकण्यात आले आहे. मात्र, महायुतीमध्ये एकत्र असलेले भाजपचे विद्यमान आमदारांचे नाव टाळल्याने समर्थकांमध्ये नाराजीचा सूर उफाळून आला आहे.