Teacher Recruitment Andhra Pradesh – आंध्र प्रदेशातील सुमारे १६,००० सरकारी शिक्षकांच्या भरतीसाठी घेण्यात आलेल्या जिल्हा निवड समिती परीक्षेत मोठे गैरव्यवहार झाल्याचा आरोप करत विरोधी पक्ष वायएसआर काँग्रेसने राज्यभर तीव्र निदर्शने केली.

या संपूर्ण प्रकरणाची सीबीआय चौकशी करण्याची मागणी वायएसआरसीपीने केली आहे. दुसरीकडे, मुख्यमंत्री एन. चंद्राबाबू नायडू यांनी ही भरती पूर्णपणे पारदर्शक पद्धतीने झाल्याचे सांगत विरोधकांवर राजकारण करत असल्याचा पलटवार केला आहे.

वायएसआरसीपीच्या युवा आघाडीच्या आवाहनावर हजारो बेरोजगार तरुण आणि पक्षाच्या नेत्यांनी राज्यातील सर्व जिल्हाधिकारी कार्यालयांवर मोर्चे काढले आणि डीएससी घोटाळ्याचा निषेध केला.

टीडीपीच्या नेतृत्वाखालील एनडीए सरकारने केवळ या परीक्षेसाठी विशेष शासकीय आदेश काढून नंतर ते मागे घेतले, ज्याचा उद्देश क्रीडा कोट्यात फेरफार करणे हा होता, असा आरोप आंदोलकांनी केला.

यामुळे कोणतीही क्रीडा पार्श्वभूमी नसलेल्या अपात्र व्यक्तींना बनावट प्रमाणपत्रांच्या आधारे नोकऱ्या मिळाल्या आणि पात्र उमेदवार वंचित राहिले, असा दावा पक्षाने केला आहे.

गुणवत्ता डावलून पैशांच्या जोरावर शिक्षकांच्या जागा विकल्या गेल्याचा आरोप करत आंदोलकांनी शिक्षणमंत्री नारा लोकेश यांच्या तात्काळ राजीनाम्याची मागणी केली आहे. तसेच पेपर लीक आणि इतर अनियमिततेची निष्पक्ष चौकशी करण्यासाठी जिल्हाधिकाऱ्यांना निवेदन सादर केले.

दरम्यान, काकिनाडा जिल्ह्यातील चामवरम गावात एनटीआर भरोसा पेन्शन वाटप कार्यक्रमादरम्यान बोलताना मुख्यमंत्री नायडू यांनी विरोधकांचे आरोप फेटाळले.

टीडीपी सरकारच्या सुशासनाला बदनाम करण्यासाठी वायएसआरसीपी कट रचत असल्याचा आरोप त्यांनी केला. वायएसआरसीपीने त्यांच्या संपूर्ण सत्ताकाळात एकही शिक्षक भरती केली नाही.

उलट या भरती प्रक्रियेत अडथळे आणण्यासाठी २४१ खटले दाखल केले गेले. आमचे सरकार आल्यावर आम्ही हे सर्व कायदेशीर अडथळे दूर करून शिक्षक भरती पूर्ण केली, असे नायडू म्हणाले.