Maharashtra Politics : महाराष्ट्राच्या राजकारणात (Maharashtra Politics) सध्या काहीही अशक्य राहिलेले नाही, असे म्हटले तर ते वावगे ठरणार नाही. कारण गेल्या काही दिवसांपासून राज्याच्या राजकीय वर्तुळात अत्यंत वेगवान आणि अनपेक्षित घडामोडी घडताना दिसत आहेत.

काही दिवसांपूर्वीच शरद पवार गटाचे ज्येष्ठ नेते आणि आमदार जयंत पाटील यांनी मुख्यमंत्री देवेंद्र फडणवीस यांची भेट घेतली होती, ज्यामुळे राजकीय वर्तुळात अनेकांच्या भुवया उंचावल्या होत्या. ही चर्चा थंडावते न थंडावते तोच, आज पुन्हा एकदा जयंत पाटील यांनी आमदार जितेंद्र आव्हाड यांच्या समवेत उपमुख्यमंत्री एकनाथ शिंदे यांची भेट घेतल्याने नव्या राजकीय चर्चांना उधाण आले आहे.

या सर्व गूढ गाठीभेटींच्या पार्श्वभूमीवर आता आमदार रवी राणा यांनी एक खळबळजनक राजकीय भविष्यवाणी केली असून, त्यांच्या या वक्तव्याने महाराष्ट्राच्या राजकारणात पुन्हा एकदा मोठी खळबळ (Maharashtra Politics) उडवून दिली आहे.

आमदार रवी राणा यांनी अत्यंत मोठा दावा करताना म्हटले आहे की, येणाऱ्या अवघ्या पंधरा दिवसांच्या कालावधीत शरद पवार आणि अजित पवार यांचे दोन्ही राष्ट्रवादी काँग्रेसचे गट पुन्हा एकदा एकत्र येतील.

दोन्ही राष्ट्रवादीच्या या संभाव्य विलिनीकरणानंतरच्या समीकरणांवर प्रकाश टाकताना त्यांनी सांगितले की, एकत्र आल्यानंतर सुप्रिया सुळे यांची केंद्र सरकारमध्ये मंत्री म्हणून वर्णी लागू शकते, तर दुसरीकडे राज्याची संपूर्ण धुरा सुनेत्रा पवार यांच्याकडे सोपवली जाईल. रवी राणा यांच्या या विधानाने दोन्ही गटातील कार्यकर्त्यांमध्ये आणि राजकीय विश्लेषकांमध्ये तर्कवितर्कांना प्रचंड वेग आला आहे.

राष्ट्रवादीच्या या विलिनीकरणाच्या दाव्यासोबतच रवी राणा यांनी शिवसेना आणि ठाकरे गटाच्या एकत्र येण्याबाबतही एक मोठी भविष्यवाणी केली आहे. उद्धव ठाकरे यांनी देखील आता प्रभू श्रीराम आणि भगवंताच्या विचारांचा पुन्हा स्वीकार केला आहे, त्यामुळे भविष्यात उद्धव ठाकरे आणि एकनाथ शिंदे हे दोन्ही नेते सुद्धा आपले मतभेद बाजूला सारून पुन्हा एकत्र येऊ शकतात, असा थेट दावा राणा यांनी केला आहे.

आजच्या घडीला राजकारणामध्ये पूर्वी ज्या गोष्टी अशक्य वाटत होत्या, त्या आता सहज शक्य झाल्या आहेत असे म्हणत रवी राणा यांनी महाराष्ट्राच्या आगामी राजकीय समीकरणांबाबत अत्यंत मोठे आणि धक्कादायक संकेत दिले आहेत. त्यामुळे आमदार (Maharashtra Politics) रवी राणा यांनी वर्तवलेल्या या भविष्यवाणीनुसार खरोखरच येणाऱ्या १५ दिवसांत महाराष्ट्राच्या राजकारणात एवढे मोठे भूकंप घडतात का, हे पाहणे आता संपूर्ण राज्यासाठी अत्यंत महत्त्वाचे ठरणार आहे.