Political News : गडचिरोलीचे जिल्हाधिकारी यांच्या बनावट स्वाक्षरी प्रकरणी पोलीस तपासाला मोठी गती आली असून, या घोटाळ्यात (Political News) थेट राजकीय कनेक्शन समोर आले आहे. भाजप नेत्या सोनाली पिपरे यांचे पती आणि स्वीकृत नगरसेवक आशिष पिपरे यांना पोलिसांनी याप्रकरणी अटक केली आहे.

न्यायालयाने आरोपी आशिष पिपरे याला पाच दिवसांची पोलीस कोठडी सुनावली असून, या कारवाईमुळे जिल्ह्याच्या राजकीय आणि प्रशासकीय वर्तुळात प्रचंड खळबळ उडाली आहे.

नेमकं काय आहे प्रकरण?
मिळालेल्या माहितीनुसार, जिल्हाधिकाऱ्यांच्या स्वाक्षरीची कथित बनावट प्रत तयार करून काही शासकीय कागदपत्रांवर (Political News) त्याचा गैरवापर करण्यात आला होता. हे प्रकरण समोर आल्यानंतर प्रशासकीय स्तरावर तातडीने चौकशी सुरू करण्यात आली.

पोलिसांनी या प्रकरणाचा तांत्रिक आणि गोपनीय तपास करत काही अत्यंत महत्त्वाचे पुरावे गोळा केले. या पुराव्यांच्या आधारे चामोर्शी नगरपंचायतीचे स्वीकृत नगरसेवक आशिष पिपरे यांच्यावर गुन्हा दाखल करून त्यांना अटक करण्यात आली.

रॅकेटचा पर्दाफाश होणार?
न्यायालयाने आरोपी पिपरे याला पाच दिवसांची पोलीस कोठडी सुनावली आहे. या कोठडीदरम्यान पोलीस आरोपीची कसून चौकशी करणार आहेत. जिल्हाधिकाऱ्यांची बनावट सही तयार करण्याच्या या गंभीर गुन्ह्यामागे आणखी कोणाचा हात आहे का, हे शोधणे पोलिसांचे मुख्य उद्दिष्ट आहे. तसेच, हे केवळ वैयक्तिक पातळीवर केलेले कृत्य आहे की यामागे एखादे मोठे रॅकेट सक्रिय आहे, याचाही सखोल तपास पोलीस करत आहेत.

वादग्रस्त पार्श्वभूमी आणि राजकीय खळबळ
जिल्हाधिकाऱ्यांच्या सहीसारख्या अत्यंत संवेदनशील आणि सर्वोच्च प्रशासकीय पदाशी संबंधित हा फसवणुकीचा प्रकार असल्याने संपूर्ण प्रशासन हादरले आहे. अटक करण्यात आलेला आरोपी आशिष पिपरे हा यापूर्वी भाजपमध्ये सक्रिय होता.

विशेष म्हणजे, भाजपमध्ये कार्यरत असतानाच त्याने राजकीय खेळी करत काँग्रेसच्या गटातून स्वीकृत नगरसेवक पद मिळवले होते. या राजकीय घडामोडींनंतर, सुमारे तीन महिन्यांपूर्वीच त्याची भाजपमधून हकालपट्टी करण्यात आली होती. मात्र, त्याची पत्नी सोनाली पिपरे या अजूनही भाजपच्या सक्रिय नेत्या आणि नगरसेविका आहेत.

महिलांची फसवणूक केल्याचाही आरोप
आशिष पिपरे याची पार्श्वभूमी आधीपासूनच वादग्रस्त राहिली आहे. शासकीय स्वाक्षरीच्या गैरवापराव्यतिरिक्त, त्याच्यावर यापूर्वी ‘अगरबत्ती प्रकल्पा’च्या नावाखाली परिसरातील शेकडो गरीब महिलांची आर्थिक फसवणूक केल्याचा गंभीर आरोपही (Political News) करण्यात आला आहे. आता या नवीन आणि गंभीर प्रकरणामुळे पिपरे याच्या अडचणीत मोठी वाढ झाली असून, पोलीस तपासात आणखी कोणते धक्कादायक खुलासे होतात, याकडे सर्वांचे लक्ष लागले आहे.