PMC News – पुणे ग्रँड सायकल टूर या आंतरराष्ट्रीय सायकल स्पर्धेसाठी महापालिकेने शहरातील तब्बल ७५ किलोमीटर रस्ते आंतरराष्ट्रीय मानांकनानुसार विकसित केले होते. या रस्त्यांवरील वाहतुकीची गती वाढली असून, खड्डेमुक्त व चेंबर समपातळीत असलेल्या या रस्त्यांसाठी पुणेकरांनी महापालिकेचे कौतुक केले होते. मात्र, आता याच रस्त्यांवर महापालिका काढलेले स्पीड ब्रेकर पुन्हा बसविणार आहे.यामुळे या रस्त्यांवरील वाहतुकीचा वेग काहीसा मंदावणार आहे.सायकल स्पर्धेसाठी प्रशासनाने हे स्पीड ब्रेकर तात्पुरते काढले होते. महापालिकेच्या पथ विभागाचे प्रमुख अनिरुद्ध पावसकर यांनी याबाबतची माहिती दिली. मात्र, शहरात स्पीड ब्रेकर उभारताना इंडियन रोड काँग्रेसचे निकष पाळले जात नसल्याचे चित्र शहरभर पाहायला मिळते. स्पीड ब्रेकर पुन्हा बसवल्यावर वाहतुकीचा वेग वाढलेल्या या रस्त्यांवर पुन्हा वाहतूक कोंडी होऊ शकते. या रस्त्यांवर ८४ ठिकाणी स्पीड ब्रेकर तसेच पादचाऱ्यांसाठी रस्ता ओलांडण्याचे मार्ग होते. निश्चित धोरणाची गरज मागील वर्षी टॉम टॉम संस्थेच्या अहवालानुसार पुणे हे वाहतूक कोंडीबाबत जगातील चौथ्या क्रमांकाचे शहर ठरले होते. त्यानंतर शहरातील वाहतूक कोंडी कमी करण्यासाठी शहर वाहतूक पोलीस आणि महापालिकेने शहरातील एकूण वाहतुकीपैकी सुमारे ८५ टक्के भार असलेल्या ३२ प्रमुख रस्त्यांवर लक्ष केंद्रीत केले. पुणे ग्रँड सायकल टूर या रस्त्यांवर वाहतुकीस अडथळे, अतिक्रमणे, रस्त्यांच्या रचनेतील त्रुटी अशी विविध कारणे समोर आली. तसेच, वाहतुकीची गती मंदावण्यास अनावश्यक व अशास्त्रीय पद्धतीने टाकलेले स्पीड ब्रेकर जबाबदार असल्याचेही निदर्शनास आले. त्यानंतर वाहतूक पोलिसांच्या सूचनेनुसार महापालिकेने स्पीड ब्रेकर काढण्याची विशेष मोहीम हाती घेतली होती. या मोहिमेत जवळपास साडेचारशे स्पीड ब्रेकर काढण्यात आले. काही अशास्त्रीय स्पीड ब्रेकर दुरुस्त करण्यात आले. त्यानंतर काही स्थानिक पोलीस ठाण्यांनी महापालिकेला पत्र देत संबंधित रस्त्यांवर अपघात वाढल्याने स्पीड ब्रेकर बसविण्याची मागणी केली. त्यामुळे स्पीड ब्रेकरबाबत महापालिका आणि पोलीस यांच्यात निश्चित धोरण असण्याची आवश्यकता अधोरेखित होते. “स्पर्धेसाठी तयार केलेल्या रस्त्यांवर वाहतुकीचा वेग वाढला आहे. अशा परिस्थितीत नागरिकांना सुरक्षितपणे रस्ता ओलांडण्यासाठी तसेच वाहतुकीवर नियंत्रण ठेवण्यासाठी स्पीड ब्रेकरची गरज आहे. हे स्पीड ब्रेकर इंडियन रोड काँग्रेसच्या मानकानुसार उभारण्यात येणार आहेत. त्यावर थर्मोप्लास्टिक पेंट मारले जाईल, तसेच सूचना फलकही लावण्यात येणार आहेत. रात्रीच्या वेळी स्पीड ब्रेकर स्पष्टपणे दिसावेत यासाठी कॅट आय साईन (रात्री चमकणारे दिवे) बसविण्यात येणार आहेत.” – अनिरुद्ध पावसकर (पथ विभाग प्रमुख)
