PMC Health News – महाराष्ट्र शासनाच्या महात्मा फुले जन आरोग्य योजनेत महापालिकेच्या सर्व रुग्णालयांसह पीपीपी तत्त्वावर चालविण्यास दिलेल्या भानगिरे रुग्णालयाचेही नोंदणीकरण बंधनकारक करावे, अशी मागणी सजग नागरिक मंचचे अध्यक्ष विवेक वेलणकर यांनी केली आहे. या योजनेअंतर्गत राज्यातील नागरिकांना पाच लाख रुपयांपर्यंत मोफत उपचाराची सुविधा उपलब्ध आहे.

मात्र, नोंदणीकृत रुग्णालयात दाखल झालेल्या रुग्णांनाच या योजनेचा लाभ मिळतो. महात्मा फुले जन आरोग्य योजनेत अनेक खासगी आणि मोठी रुग्णालये नोंदणी करण्यास टाळाटाळ करीत असल्याने तेथे उपचार घेणाऱ्या रुग्णांना या योजनेचा लाभ मिळत नाही.

मात्र, किमान महापालिकेच्या स्वतःच्या रुग्णालयांनी तसेच पीपीपी तत्त्वावर चालविण्यास दिलेल्या सर्व रुग्णालयांनी या योजनेत नोंदणी करणे आवश्यक आहे. यातून महापालिकेच्या बजेटवर पडणारा कोट्यवधी रुपयांचा उपचार खर्च वाचू शकतो, असे वेलणकर यांनी नमूद केले आहे.
वेलणकर म्हणाले की,

सोमवारी माहिती अधिकारातून मिळालेल्या माहितीनुसार महापालिकेच्या स्वतःच्या १९ रुग्णालये आणि प्रसूतीगृहांपैकी सध्या केवळ डाॅ. दळवी रुग्णालय, सोनावणे प्रसूतीगृह, राजीव गांधी रुग्णालय आणि कमला नेहरू रुग्णालय या चार रुग्णालयांचेच महात्मा फुले जन आरोग्य योजनेत नोंदणीकरण करण्यात आले आहे. उर्वरित रुग्णालयांचे नोंदणीकरण अद्याप झालेले नाही.

तसेच पीपीपी तत्त्वावर चालविण्यास दिलेल्या भानगिरे रुग्णालयाचेही या योजनेत नोंदणीकरण नसल्याचे समोर आले आहे. महापालिकेच्या उर्वरित सर्व रुग्णालयांना तसेच भानगिरे रुग्णालयाला तातडीने महात्मा फुले जन आरोग्य योजनेत नोंदणी करण्यास भाग पाडावे, अशी आग्रहाची मागणी त्यांनी केली आहे.

पीपीपी तत्त्वावर चालविण्यास दिलेल्या आणि महात्मा फुले जन आरोग्य योजनेत आधीच नोंदणीकृत असलेल्या रुग्णालयांना पालिकेच्या शहरी गरीब योजनेतून दुहेरी पैसे दिले जात नाहीत ना, याची गेल्या दोन वर्षांची सखोल तपासणी व लेखापरीक्षण करावे, अशीही मागणी सजग नागरिक मंच करण्यात आली आहे.