PMC Construction Rules – बांधकाम प्रकल्पांना दोन तासांची वाढ देऊन बांधकाम व्यावसायिकांना महापालिकेने दिलासा दिला आहे. याआधी सकाळी आठ ते रात्री आठ या वेळेतच बांधकाम प्रकल्पांची कामे करण्याला परवानगी देण्यात आली होती. ती आता दोन तासांनी वाढवली असून, नवीन नियमानुसार सकाळी सात ते रात्री आठ या वेळेत कामे पूर्ण करता येणार आहे. नगर अभियंता अनिरुद्ध पावसकर यांनी हे आदेश काढले आहेत. पुणे महापालिका हद्दीमध्ये विविध ठिकाणी सध्या मोठ्या प्रमाणावर इमारत बांधकामे, खोदकामे सुरू असून, या कामांमुळे मोठ्या प्रमाणात हवा आणि ध्वनिप्रदूषण होते. सकाळी लवकर अणि रात्री उशिरापर्यंत सुरू असलेल्या बांधकामामुळे प्रदूषणात अधिक वाढ होत असून, शहरातील हवा गुणवत्ता निर्देशांक खालावत आहे. त्यामुळे नागरिकांच्या आरोग्यावर गंभीर परिणाम होत आहेत. या प्रदूषणाबाबत स्थानिक नागरिकांकडून वेळोवेळी महापालिकेकडे तक्रारी प्राप्त होत आहेत. अनेक नागरिकांनी महाराष्ट्र प्रदूषण नियंत्रण मंडळाकडे (एमपीसीबी) तक्रारीही केल्या आहेत. त्यानुसार एमपीसीबीनेही महापालिकेला यासंदर्भात आदेश दिले होते. या प्रकारे धुळीचे साम्राज्य आणि बांधकाम नियमांचे पालन न केल्याप्रकरणी एका बांधकाम व्यावसायिकांना नोटीस देऊन त्यांचे कामही थांबवले होते. पुणे महापालिका त्यामुळे महापालिकेने यासंदर्भात कार्यवाही करत, बांधकाम करण्यासाठी वेळेची मर्यादा घातली होती. गेल्या महिन्यात सकाळी आठ ते रात्री आठ याच वेळेत बांधकाम सुरू ठेवण्याचे निर्देश दिले होते. ठरवलेल्या वेळेआधी आणि नंतर काम सुरू राहिल्यास कारवाई करण्याचा इशारा दिला होता. मात्र, बांधकाम वेळेत पूर्ण करण्याच्या रेराच्या अटी, ग्राहकांविषयीची बांधिलकी या सगळ्या गोष्टींमुळे बांधकाम व्यावसायिकांनी या वेळेबाबत नाराजी दर्शविली होती. शिवाय बांधकाम साहित्यासंबंधीची जड वाहतूक करण्यालाही वेळेमुळे अडचणी येत होत्या. त्यामुळे ही वेळ वाढवून देण्यासंदर्भातील मागणी त्यांनी केली होती. त्या अनुषंगाने दोन तासांनी ही वेळ वाढवून देण्यात आली आहे. येथून पुढे सकाळी सात ते रात्री नऊ या वेळेत प्रकल्पांचे काम करता येणार असल्याचे नवीन अध्यादेशात स्पष्ट करण्यात आले आहे.
