प्रभात वृत्तसेवा
पिंपरी – ॲानलाइन औषध विक्रीच्या नावाखाली रुग्णांच्या आरोग्याशी खेळ केला जात असल्याचा धक्कादायक प्रकार उघड झाला आहे. अन्न व औषध प्रशासनाचे मंत्री नरहरी झिरवळ यांच्या नावाने ऑनलाइन औषध मागवले असता ते उपलब्ध झाले आहेत. पुण्यातील केमिस्ट असोसिएशन ॲाफ पुणे डिस्ट्रीक्टचे विवेक तापकीर यांनी अन्न व औषध प्रशासनाकडे औपचारिक तक्रार दाखल करून ॲानलाइन औषध विक्री पोर्टलविरोधात गंभीर आरोप केले आहेत.

अन्न व औषध प्रशासनाचा भोंगळ कारभार पुन्हा एकदा चव्हाट्यावर आला आहे. शनिवारी (दि. ११) विवेक तापकीर यांनी ट्र्मेड्स या पोर्टलवरून कोणतेही डॉक्टरांचे प्रिस्क्रिप्शन न देता औषधे मागवली. ही औषधे मागवताना अन्न व औषध प्रशासना मंत्री नरहरी झिरवळ यांच्या नावानेच मागविण्यात आली. चक्क त्याच खात्याच्या मंत्र्याच्या नावाने औषधे मागवली असताना ती आली, त्यामुळे अन्न व औषध प्रशासनाकडून ऑनलाइन औषधांवर असलेली बंदी कितपत लागू आहे हे सिद्ध झाले आहे.

याबाबत विवेक तापकीर म्हणाले, कोणतेही डॉक्टरांचे प्रिस्क्रिप्शन न देता औषधे मिळत आहेत. धक्कादायक म्हणजे ही औषधे अन्न व औषध प्रशासन मंत्र्यांच्या नावाने मागवली असताना देखील ती उपलब्ध होत आहेत. मागवलेली औषधे वाघोली येथून पाठविण्यात आली आहे. ही बाब कायद्याच्या परिघाबाहेरची असून, रुग्णांच्या जीवितास गंभीर धोका निर्माण करणारी आहे. या गंभीर प्रकरणाची अन्न व औषध प्रशासनाने दखल घेतली असून, सह आयुक्त गिरीष हुकरे यांच्याकडे या तक्रारीची अधिकृत पोहोच नोंदविण्यात आली आहे.

“ऑफलाईन केमिस्ट औषध विक्री करताना डॉक्टरांचे प्रिस्क्रिप्शन तपासतात आणि फार्मासिस्टच्या उपस्थितीतच विक्री करतात. पण या ॲानलाईन विक्रीत कायद्याचे सर्व नियम पायदळी तुडवले जात आहेत. या संदर्भात सखोल चौकशी करून संबंधितांवर कठोर कारवाई करण्याची मागणी केली आहे.”
— विवेक तापकीर, सामाजिक कार्यकर्ते