Pimpri Chinchwad RTO – व्यावसायिक वाहनांच्या फिटनेस तपासणीत पारदर्शकता, अचूकता आणि वेग आणण्यासाठी पिंपरी-चिंचवड उप प्रादेशिक परिवहन कार्यालयाच्‍या वतीने ‘ऑटोमेटेड टेस्टिंग’ सुरू करण्यात आली आहे. केंद्र सरकारच्या निर्देशानुसार १ जुलै २०२६ पासून परिवहन संवर्गातील वाहनांच्या योग्यता प्रमाणपत्राच्या नूतनीकरणासाठी स्वयंचलित वाहन चाचणी केंद्र कार्यान्वित करण्यात आले आहे.

यामुळे व्यावसायिक वाहनांच्या फिटनेस तपासणीची संपूर्ण प्रक्रिया आता संगणकीकृत पद्धतीने होणार आहे. उप प्रादेशिक परिवहन अधिकारी आश्विनी स्वामी यांनी दिलेल्या माहितीनुसार, रस्ते वाहतूक आणि महामार्ग मंत्रालयाच्या अधिसूचनेनुसार ही व्यवस्था सुरू करण्यात आली आहे. मोटार वाहन कायद्यानुसार सर्व व्यावसायिक वाहनांना वैध फिटनेस प्रमाणपत्र असणे बंधनकारक असून, त्यासाठी आता स्वयंचलित चाचणी केंद्राची सुविधा उपलब्ध होणार आहे.

हे अत्याधुनिक चाचणी केंद्र सुमारे ११ हजार चौरस फूट जागेत उभारण्यात आले आहे. येथे दोन हजार चौरस फुटांचे प्रशस्त कार्यालय असून वाहन तपासणीसाठी ३३ मीटर लांबीचे चार स्वतंत्र ट्रॅक तयार करण्यात आले आहेत. यापैकी दोन ट्रॅक मालवाहतूक आणि प्रवासी वाहनांसाठी राखीव असतील. केंद्रात चार इन्स्पेक्शन पीटची सुविधा असून दररोज सुमारे ३०० वाहनांची तपासणी करण्याची क्षमता विकसित करण्यात आली आहे.

या सुविधेचा लाभ वाहनधारकांना ऑनलाइन पद्धतीने घेता येणार असून अपॉइंटमेंट घेणे बंधनकारक राहणार आहे. वाहनधारकांनी वाहन पोर्टलवरील अधिकृत संकेतस्थळावर जाऊन राज्य, जिल्हा आणि वाहनाचा प्रकार निवडून स्वयंचलित चाचणी केंद्रासाठी वेळ निश्चित करावी. नोंदणीकृत मोबाईल क्रमांकावर प्राप्त होणारा ओटीपी टाकून प्रक्रिया पूर्ण करावी आणि विहित शुल्क ऑनलाइन भरावे.

मोबाईल क्रमांक अद्ययावत नसल्यास तो प्रथम आरटीओच्या नोंदीत अद्ययावत करणे आवश्यक आहे. आरटीओ प्रशासनाने वाहनधारकांना चाचणीसाठी येताना वाहन पूर्णपणे सुस्थितीत आणण्याचे आवाहन केले आहे. तसेच वाहनाची सर्व वैध कागदपत्रे, व्हेईकल लोकेशन ट्रॅकिंग डिव्हाइस, स्पीड लिमिटर आणि रेट्रो रिफ्लेक्टिव्ह टेपसंदर्भातील आवश्यक प्रमाणपत्रे सोबत आणणे बंधनकारक राहणार आहे.

स्वयंचलित वाहन चाचणी प्रणालीमुळे तपासणी प्रक्रियेत मानवी हस्तक्षेप कमी होणार असून, फिटनेस चाचणी अधिक पारदर्शक, विश्वासार्ह आणि वेळेची बचत करणारी ठरणार आहे. वाहनधारकांनी कोणतीही गैरसोय टाळण्यासाठी वेळेत ऑनलाइन नोंदणी करून निश्चित वेळेनुसारच वाहन चाचणीसाठी आणावे, असे आवाहन उप प्रादेशिक परिवहन कार्यालयाने केले आहे.