Pimpri Chinchwad Crime – सोनसाखळी हिसकावण्याच्या गुन्ह्यांत अटक होऊन दोन वर्षांपूर्वी कारागृहातून बाहेर आलेल्या एका चोरट्याने अनेक कामे केली. दरम्यान त्याला ऑनलाइन बेटिंगचे व्यसन लागले. त्यात तो कर्जबाजारी झाला. कर्ज फेडण्यासाठी आणि झटपट पैसे कमावण्यासाठी त्याने क्राइम पेट्रोल ही सिरीयल पाहून जुन्या मोडसमध्ये काही बदल करून नव्याने सोनसाखळी चोरी सुरु केली.

या अट्टल चोराला पिंपरी-चिंचवड पोलिसांच्या क्राइम ब्रांच एकने अटक केली. त्याच्याकडून १५ लाख रुपये किमतीचे दागिने जप्त केले आहेत. सुमित गोविंद इंगळे (वय ३१, रा. मामुर्डी, पुणे. मूळ रा. श्रीपत पिंपरी, बार्शी, सोलापूर) असे अटक केलेल्या चोरट्याचे नाव आहे. अपर पोलीस आयुक्त सारंग आवाड म्‍हणाले की, सांगवी पोलीस ठाण्याच्या हद्दीत घडलेल्‍या एका सोनसाखळी चोरीच्‍या गुन्ह्याचा समांतर तपास करता गुन्‍हे शाखेच्‍या पथकाला सीसीटीव्‍ही फूटेजमध्ये स्‍पोर्टस बाइकवरुन सोनसाखळी चोरत असल्‍याचे दिसून आले.

सीसीटीव्‍हीत तो मुंबई-बेंगलोर महामार्गावरून येत-जात असल्याचे निष्पन्न झाले. परंतु त्याची ओळख पटली नाही. त्यामुळे पोलिसांनी त्याची गाडी चालवण्याची पद्धत आणि इतर गोष्टी लक्षात घेऊन त्यानुसार शोध सुरु केला. गुप्‍त माहितीच्‍या आधारे बाणेर परिसरात सकाळी पोलिसांनी सापळा लावला. मात्र तो सकाळी आला नाही. पोलिसांनी रात्रीच्या वेळी देखील त्याचा शोध घेतला. तो एका गल्लीतून जात असताना पोलिसांनी त्याला गाडीवरून धक्का देऊन खाली पाडत ताब्यात घेतले. चौकशी दरम्‍यान त्‍याने इतरही गुन्‍ह्यांची कबुली दिली.

चोरीत केले बदल
सुमित इंगळे हा पोलीस रेकॉर्डवरील गुन्हेगार आहे. २०१६ पासून तो अशा प्रकारचे चोरीचे गुन्हे करत आहे. शिरवळ पोलीस ठाण्यात त्याच्यावर फसवणुकीचे दोन तर हिंजवडी, सांगवी, सिंहगड पोलीस ठाण्यात सोनसाखळी हिसकावल्याचे गुन्हे दाखल आहेत. २०२४ मध्ये त्याला अटक झाली. त्यानंतर तो काही दिवसांनी जेलमधून बाहेर आला. त्याने सुरुवातीला डिलिव्हरी बॉय म्हणून काम केले. ओला उबर कंपनीसोबत कार चालवली.

चायनीज गाडी सुरु केली. मात्र तो कोणत्याही एका व्यवसायात फार काळ टिकला नाही. दरम्यान त्याला ऑनलाइन बेटिंगचे व्यसन लागले. त्यात तो कर्जबाजारी झाला. झालेले कर्ज फेडण्यासाठी आणि झटपट पैसे कमावण्यासाठी त्याने पुन्हा सोनसाखळी चोरी करण्याचा विचार केला. मात्र मागील वेळी आपल्याला पोलिसांना पकडले असल्याने आता त्यात काहीतरी बदल करण्याचा विचार त्याने केला. त्याने क्राइम पेट्रोल या सिरीयलचे काही भाग पाहून त्यातून सोनसाखळी चोरीसाठी आवश्यक माहिती घेतली. त्यानुसार तो पुन्हा चोऱ्या करू लागला.