PCMC Tax Collection – पिंपरी-चिंचवड महापालिकेच्या कर आकारणी व कर संकलन विभागाने चालू आर्थिक वर्षाच्या पहिल्या तिमाहीमध्ये कर वसुलीचा उच्चांक गाठत रेकॉर्डब्रेक वसुली केली आहे. अवघ्या तीन महिन्यांत ५२६ कोटी १४ लाख रुपयांचा मालमत्ता कर वसूल करण्यात विभागाला यश आले आहे. सात लाख ४४ हजार ६३० नोंदणीकृत मालमत्ता धारकांपैकी पहिल्या तिमाहीमध्येच ५९.८४ टक्के मालमत्ता धारकांनी कर भरून विविध सवलतींचा लाभ घेतला आहे.

पिंपरी-चिंचवड शहरात सध्या निवासी, बिगरनिवासी, औद्योगिक व इतर मिळून सुमारे ७ लाख ४४ हजार ६३० मालमत्तांची नोंद असून त्यापैकी ४ लाख ४५ हजार ६२० मालमत्ताधारकांनी कराचा भरणा केला आहे. पहिल्या तिमाहित कर भरणाऱ्या नागरिकांची संख्या दरवर्षी वाढत आहे. नागरिकांनी मालमत्ताकर भरण्यासाठी करसंकलन विभागाने विविध उपाययोजना राबविल्या.

त्याच्या माध्यमातून करदात्यांपर्यंत मालमत्ताकरावरील सवलतीबाबत विविध प्रकारे जनजागृती करण्यात आली. यामुळे नागरिकांना सवलतीबाबत माहिती होऊन नागरिकांनी पहिल्या तिमाहीमध्येच आपला मालमत्ताकर भरण्यासाठी प्राधान्य दिले आहे. सवलतीबाबत जनजागृती झाल्याने, सन २०२६-२७ या चालू आर्थिक वर्षाच्या पहिल्या तिमाहीमध्ये एकूण मालमत्ताधारकांपैकी ४ लाख ४५ हजार ६२० मालमत्ताधारकांनी कर भरला असून,

त्यापैकी ३ लाख ४७ हजार ५६४ मालमत्ता धारकांनी ऑनलाइन स्वरूपात कर भरून सवलतींचा लाभ घेतला आहे. गतवर्षीप्रमाणे यावर्षीही पालिकेने राबविलेल्या महिला बचत गटामार्फत मालमत्ताधारकांना घरपाेच बिलाचे वाटप केले, त्यामुळे नागरिकांनी ३० जूनपर्यंत महापालिकेच्या इतिहासात पहिल्यांदाच सर्वाधिक कराचा भरणा केल्याची माहिती उपायुक्त सचिन पवार यांनी दिली.

वाकड झोनमधून उच्चांकी कर वसूल
शहरात कर संकलनासाठी महापालिकेचे १८ झोन आहेत. यामध्ये वाकड विभागीय कार्यालयांतर्गत सर्वात जास्त वसुली झाली आहे. वाकडमध्ये ७२ कोटी ८७ लाख, थेरगाव ४६ कोटी ७१ लाख, कस्पटे वस्ती ३९ कोटी ३३ लाख, चिखली कार्यालयाने ३७ कोटी ९५ लाख, किवळे ३८ कोटी ३७ लाख, चिंचवड ३४ कोटी ४७ लाख, भोसरी ३४ कोटी ७३ लाख, मोशी ३१ कोटी २२ लाख,

पिंपरी वाघेरे ३२ कोटी ५३ लाख, सांगवी २६ कोटी, मनपा भवन २८ कोटी ७५ लाख, आकुर्डी २३ कोटी ९० लाख, चऱ्होली १७ कोटी ८२ लाख, फुगेवाडी २० कोटी ९७ लाख, दिघी-बोपखेल ११ कोटी ८८ लाख, तळवडे ११ कोटी २३ लाख, निगडी प्राधिकरण १३ कोटी २५ लाख, पिंपरीनगर ३ कोटी ९९ लाख असा कर वसूल झाला आहे.

“पहिल्या तिमाहीतच जास्तीत जास्त कर वसूल करण्याचे उद्दिष्ट ठेवण्यात आले होते. त्यानुसार सूक्ष्म नियोजन केले, वेळोवेळी वरिष्ठांच्या मार्गदर्शनाखाली आढावा घेतला. त्यामुळेच 526 कोटींचा कर वसुल करण्यात यश आले. विभागाच्या सर्व कर्मचाऱ्यांच्या सांघिक कामगिरीमुळे हे शक्य झाल–े. मोठ्या थकबाकीदारांना यापूर्वीच जप्तीच्या नोटीस बजावल्या आहेत. अशा मोठ्या आणि व्यावसायिक थकबाकीदारांकडे यापुढील काळात लक्ष केंद्रित करण्यात येणार असून जप्ती माेहीम सुरू केली जाणार आहे. त्यामुळे नागरिकांनी आपली मालमत्ता जप्त हाेऊ नये, यासाठी तात्काळ कराचा भरणा करावा.”
– सचिन पवार, उपायुक्त, कर आकारणी व कर संकलन विभाग.