प्रभात वृत्तसेवा पुणे – राज्यात यावर्षी फार्मसी अभ्यासक्रमाच्या प्रवेशासाठी मोठी चुरस पाहायला मिळत आहे. फार्मसी कौन्सिल ऑफ इंडियाने नियमांचे उल्लंघन करणाऱ्या ८९ संस्थांवर कारवाई करीत त्यांना प्रवेश प्रक्रियेबाहेर ठेवले आहे. त्यामुळे बी.फार्मसी आणि डी.फार्मसी या दोन्ही अभ्यासक्रमांसाठी एकूण ९२ संस्था बंद करण्यात आल्या आहेत, त्यामुळे सुमारे ३ हजार २४७ जागांची घट झाली आहे.यावर्षी बी.फार्मसी प्रथम वर्ष प्रवेशासाठी ५२ हजार ४६६ विद्यार्थ्यांनी अर्ज केला आहे. मात्र, राज्यभरातील ५०१ संस्थांमध्ये फक्त ४० हजार ७१० जागाच उपलब्ध आहेत. त्यामुळे तब्बल ११ हजार ७५६ विद्यार्थ्यांना प्रवेशासाठी अधिक स्पर्धा करावी लागणार आहे. बी.फार्मसाठी पहिली प्रवेश यादी ३ ऑक्टोबरला जाहीर झाली आहे.डी.फार्मसी (पदविका अभ्यासक्रम) साठी यावर्षी ३५ हजार ५३५ विद्यार्थ्यांनी अर्ज केले असून ६०७ संस्थांमध्ये एकूण ३७ हजार ८९५ जागा उपलब्ध आहेत. त्यामुळे यामध्ये काही प्रमाणात जागा रिक्त राहण्याची शक्यता आहे. डी.फार्मची पहिली यादी ७ ऑक्टोबरला प्रसिद्ध होणार आहे. अंतिम आकडेवारीची प्रतीक्षा.. गेल्या वर्षीच्या तुलनेत यावर्षी संस्थांची व जागांची संख्या घटली असली, तरी मागील वर्षी बी.फार्ममध्ये १२ हजार ७१४ व डी.फार्ममध्ये १२ हजार ४०४ अशा एकूण २५ हजारांहून अधिक जागा रिक्त राहिल्या होत्या. त्यामुळे यावर्षी उशिरा सुरू झालेल्या प्रवेश प्रक्रियेमुळे अंतिम आकडेवारी प्रतीक्षेत आहे. संस्थांची संख्याही घटली.. बी.फार्ममध्ये : गेल्या वर्षी ५१५ संस्था – यावर्षी ५०१ संस्था डी.फार्ममध्ये : गेल्या वर्षी ६८५ संस्था – यावर्षी ६०७ संस्था
