Pema Khandu : सर्वोच्च न्यायालयाच्या निर्देशानुसार सुरू असलेल्या सीबीआय चौकशीच्या पार्श्वभूमीवर, अरुणाचल प्रदेशातील भाजपने रविवारी मुख्यमंत्री पेमा खांडू (Pema Khandu)यांना आपला पूर्ण पाठिंबा दर्शवला आहे. तपास सुरू असताना नेतृत्वबदलाचा कोणताही प्रश्नच उद्भवत नाही, असे पक्षाने ठामपणे सांगितले आहे.

आसाममधील एका न्यूज पोर्टलने खांडू चालू सीबीआय चौकशीच्या पार्श्वभूमीवर राजीनामा देणार असल्याचे वृत्त दिल्यानंतर संपूर्ण राज्यात सोशल मीडियावर उलटसुलट चर्चा सुरू झाल्या होत्या. या पार्श्वभूमीवर पक्षाकडून हे स्पष्टीकरण आले आहे.

खांडू (Pema Khandu) यांच्या कुटुंबातील सदस्यांशी कथित संबंध असलेल्या कंपन्यांना २०१५ ते २०२५ दरम्यान सुमारे १,२७० कोटी रुपयांची सार्वजनिक बांधकाम कंत्राटे देण्यात आल्याच्या आरोपांची प्राथमिक सीबीआय चौकशी करण्याचे आदेश सर्वोच्च न्यायालयाने एप्रिल महिन्यात दिले होते. हा तपास सध्या सुरू आहे.

येथील पक्षाच्या मुख्यालयात पत्रकारांशी बोलताना प्रदेश भाजप अध्यक्ष कालिंग मोयोंग यांनी सांगितले की, पक्ष न्यायिक प्रक्रियेचा पूर्ण आदर करेल आणि तपास पूर्ण होईपर्यंत कोणताही निर्णय घेणार नाही. जर सर्वोच्च न्यायालयाने मुख्यमंत्र्यांविरुद्ध निकाल दिला, तर पक्ष योग्य तो निर्णय घेईल. परंतु आता नाही, कारण तपास अजूनही सुरू आहे, असे मोयोंग म्हणाले.

राज्यातील वरिष्ठ भाजप नेत्यांनी सांगितले की, पक्ष पूर्णपणे एकसंध आहे आणि सोशल मीडिया व डिजिटल प्लॅटफॉर्मवर पसरवल्या जाणाऱ्या पुष्टी न झालेल्या बातम्यांद्वारे (Pema Khandu) अफवा पसरवण्याचा प्रयत्न होत असला, तरी नेतृत्वबदलाबाबत कोणतीही चर्चा झालेली नाही. मुख्यमंत्र्यांना पुन्हा एकदा पाठिंबा दर्शवत भाजपचे सरचिटणीस तदार निगलर म्हणाले की, पक्षाचे सर्व ४६ आमदार एकाच छत्राखाली आणि एकाच नेतृत्वाखाली आहेत. पक्षात कोणतीही फूट नाही.