PCMC Water Supply – पिंपरी चिंचवड महापालिकेच्या वतीने शहरामध्ये ५१० एमएलडी पाणीपुरवठा केला जात आहे. वाढलेल्या लोकसंख्येला हे पाणी पुरत नसल्याने शहरामध्ये एक दिवसाआड पाणी पुरवठा केला जात आहे. यंदा तर सप्टेंबर महिन्यामध्येच पाण्याची बोंब झाली असून अनेक भागातील नागरिकांना पाणी मिळत नसल्याच्या तक्रारी आहेत.

त्यामध्येच पाणी गळती, रखडलेले प्रकल्प आणि पाणीपुरवठा विभागाचा गलथान कारभार यामुळे आगामी काळात पाणी समस्या जटील होत शहरातील नागरिकांच्या तोंडचे पाणी पळणार आहे. शहराला पवना धरणामधून पाणीपुरवठा केला जातो. सद्यस्थितीत धरणामधून ४१३ एमएलडी पाणीसाठी मंजूर आहे. मात्र दंड भरून महापालिका ४९० एमएलडी पाणी उचलत आहे.

हे पाणी पुरेसे नसल्याने महापालिका प्रशासनाने २५ नोव्हेंबर २०१९ पासून समन्यायिक पद्धतीने पाणीपुरवठा करण्याच्या गोंडस नावाखाली एक दिवसाआड पाणीपुरवठा सुरू केला आहे. सद्यस्थितीत शहरातील लोकसंख्या ३५ लाखांच्या घरात पोहचली आहे. त्यामुळे पवना धरणामधून होत असलेले पाणी कमी पडत आहे. तसेच जलशुद्धीकरणाची यंत्रणा नसल्याने पवना धरणामधून अधिकचे पाणी उचलण्यात अडथळा येत आहे.

आंद्रा धरणामधून महापालिकेला १०० एमएलडी पाणी मंजूर झाले आहे. हे पाणी शहराला देण्यासाठी निघोजे येथून इंद्रायणी नदीमधून पाणी उचलून ते चिखलीपर्यंत आणले आहे. तिथे जलशुद्धीकरण केंद्र उभारले आहे. तर एमआयडीसीकडून शहराला ३० एमएलडी पाणीपुरवठा केला जात आहे. खेड तालुक्यातील भामा आसखेड धरणात २६७ एमएलडी पाणी महापालिकेसाठी आरक्षित करण्यात आले आहे.

याच धरणातून पुणे महापालिकेने पाणी शहरामध्ये नेले आहे. मात्र, पिंपरी चिंचवड महापालिकेच्या या प्रकल्पाचे काम संथगतीने सुरू आहे. सुरूवातीला या कामासाठी काढलेल्या निविदा देखील वादग्रस्त ठरल्या. त्यानंतर काम सुरू केल्यानंतर देखील ठेकेदार बदलण्याची नामुष्की महापालिका प्रशासनावर आली. आता या कामासाठी नवीन ठेकेदाराची नियुक्ती करण्यात आली आहे. त्यामुळे प्रकल्प वेळेत पूर्ण करणे महापालिका प्रशासनाला शक्य झाले नाही.

प्रकल्पांची कासवगती सुरू असताना महापालिका उपलब्ध पाणी देखील नागरिकांना वेळेत देण्यास अपयशी ठरत आहे. सद्यस्थिती सुमारे ४० टक्के पाण्याची गळती होत आहे. ती पाणीगळती रोखण्यामध्ये देखील प्रशासनाला अपयश आले आहे. त्यामुळे आगामी काळात शहरातील पाणीसमस्या आणखी तीव्र होणार आहे. मात्र, त्यावर ठोस कार्यवाही करताना प्रशासन दिसत नसल्याचा आरोप होत आहे.

पाणी कपात आणखी वाढण्याची शक्यता
वाढत्या लोकसंख्येची पाण्याची वाढती मागणी यंदा दुष्काळ परिस्थितीमुळे आणखी गंभीर होण्याची शक्यता आहे. जलसंपदा विभागाने १५ टक्के पाणीकपात सुरू केलेली आहे. त्यातच जर परतीच्या पावसाने अवकृपा केली तर यामध्ये आणखी वाढ करत कपात वाढविण्याची शक्यता वर्तवली जात आहे. उपलब्ध पाण्यात पुरवठ्याचे नियोजन करताना महापालिका प्रशासनाच्या नाकी नऊ येत आहेत. अशातच आणखी कपात लागू केली तर शहरातील पाणीप्रश्‍न आणखी गंभीर होणार आहे.