PCMC News: अखेर महापालिकेचा बुलडोझर चालणार! पिंपरी-चिंचवडमधील ‘या’ ६३ भागात मोठी कारवाई
PCMC News: पावसात सखल भाग तुंबण्यापासून वाचवण्यासाठी पिंपरी-चिंचवड पालिकेचा मोठा निर्णय; डीपीआर अंतिम टप्प्यात असून लवकरच निविदा प्रक्रिया सुरू होणार.
PCMC News – पिंपरी चिंचवडमध्ये असलेल्या नैसर्गिक नाल्यांवर मोठ्या प्रमाणावर अतिक्रमण करुन बांधकाम करण्यात आले आहे. त्यामुळे पावसाळ्यात शहरात पूरस्थिती उद्भवते. ही परिस्थिती टाळण्यासाठी आता महापालिकेने कठोर पाऊले उचलण्यास सुरूवात केली आहे. त्यानुसार, पहिल्या टप्यात शहरातील ६३ अतिक्रमित नाल्यांवर कारवाई करण्यात येणार असून त्याठिकाणी बॉक्स कन्व्हर्ट उभारण्यात येणार आहे.
शहरात करण्यात आलेल्या एका विशेष सर्वेक्षणामध्ये तब्बल ३६० नैसर्गिक नाल्यांवर अनधिकृत बांधकामे आणि अतिक्रमणे झाल्याचे धक्कादायक वास्तव समोर आले आहे. या अतिक्रमणांमुळे शहरातील पावसाच्या पाण्याचा नैसर्गिक निचरा होण्यात मोठे अडथळे निर्माण होत असून, अनेक सखल भागांना तलावाचे स्वरूप येत आहे. या समस्येवर कायमस्वरूपी तोडगा काढण्यासाठी महापालिका प्रशासनाने कंबर कसली असून,
पहिल्या टप्प्यात ६३ गंभीर बाधित नाल्यांवर तात्काळ कारवाई करण्याचा निर्णय घेतला आहे. शहराचा विस्तार आणि नागरीकरण अत्यंत वेगाने होत आहे. या नागरीकरणाच्या ओघात शहरातील नैसर्गिक पाण्याचे स्त्रोत, ओढे आणि नाल्यांकडे दुर्लक्ष झाले. अनेक ठिकाणी नाल्यांचे प्रवाह वळवण्यात आले, तर काही ठिकाणी नाल्यांमध्ये राडारोडा टाकून ते बुजवण्यात आले.
पिंपरी-चिंचवड महापालिका.
कारवाई होणार
महापालिकेच्या या आक्रमक भूमिकेमुळे सखल भागात राहणाऱ्या लाखो नागरिकांना मोठा दिलासा मिळण्याची शक्यता आहे. दरवर्षी पावसाळ्यात ज्या भागांत पाणी साचून जनजीवन विस्कळीत होते, त्या भागांना या मोहिमेमुळे मोठा फायदा होईल. दुसरीकडे, महापालिकेने नाल्यांवर अतिक्रमण करणाऱ्यांना कडक इशारा दिला आहे. नाल्यांच्या नैसर्गिक प्रवाहात अडथळा आणणाऱ्यांवर कारवाई करणार आहे.
‘बॉक्स कन्व्हर्ट’ प्रणाली लागू करणार
नैसर्गिक नाल्यावर कारवाई करताना तात्पुरती मलमपट्टी न करता, प्रशासनाने दीर्घकालीन तांत्रिक उपाययोजना करण्यावर भर दिला आहे. सद्यस्थितीत नाल्यांमध्ये टाकलेले अरुंद आणि निकृष्ट दर्जाचे पाइप पूर्णपणे काढून टाकले जातील. त्याऐवजी अधिक क्षमतेचे आणि पाण्याचा प्रवाह सुरळीत ठेवणारे आधुनिक बॉक्स कन्व्हर्ट (सिमेंटचे चौकोनी गाळे) बसवले जाणार आहेत. बॉक्स कन्व्हर्टमुळे नाल्याची वहनक्षमता अनेक पटींनी वाढेल, ज्यामुळे कितीही मुसळधार पाऊस झाला तरी पाणी साचणार नाही आणि कचरा अडकण्याची समस्याही निर्माण होणार नाही.
“या महत्त्वाकांक्षी प्रकल्पासाठी पिंपरी-चिंचवड महापालिकेच्या वतीने विस्तृत प्रकल्प अहवाल तयार करण्याचे काम सुरू आहे. या डीपीआरमध्ये ६३ नाल्यांची सद्यस्थिती, तेथील अतिक्रमणांचे स्वरूप, बॉक्स कन्व्हर्टसाठी लागणारा खर्च आणि तांत्रिक बाबींचा समावेश केला जात आहे. हा डीपीआर लवकरच महापालिका आयुक्तांच्या मंजुरीसाठी सादर केला जाईल. मंजुरी मिळताच यासाठी आवश्यक असणारा निधी उपलब्ध करून देत निविदा प्रक्रिया राबवली जाणार आहे.”
– प्रेरणा सिनकर, सहशहर अभियंता, महापालिका.
