PCMC News – पिंपरी-चिंचवड महापालिकेच्या दि. २ सप्टेंबर २०२६ रोजी झालेल्‍या सर्वसाधारण सभेच्या अजेंड्‌यावरील विषय क्र. ४ मध्ये STP व जलनिःस्सारण जोडणी शुल्क आकारण्याबाबत प्रस्ताव मांडण्यात आला. या प्रस्तावामुळे शहरातील विविध गृहनिर्माण सोसायट्यांमध्ये वास्तव्यास असलेल्या नागरिकांवर अतिरिक्त आर्थिक भार पडण्याची शक्यता असून, याबाबत पुनर्विचार करावा,

अशी मागणी नगरसेवक सचिन तापकीर यांनी महापालिका आयुक्‍तांकडे केली आहे. याबाबत आयुक्‍तांना दिलेल्‍या निवेदनात म्‍हटले आहे की, एसटीपी कार्यरत ठेवणे, सांडपाण्यावर शास्त्रोक्त पद्धतीने प्रक्रिया करणे तसेच प्रक्रिया केलेल्या पाण्याचा जास्तीत जास्त पुनर्वापर करणे ही पर्यावरणाच्या दृष्टीने अत्यंत आवश्यक बाब आहे. या उ‌द्दिष्टांना माझा अथवा नागरिकांचा कोणताही विरोध नाही.

मात्र, पर्यावरण संवर्धनाच्या नावाखाली सोसायटीधारकांवर अतिरिक्त अथवा दुहेरी शुल्काचा आर्थिक बोजा टाकणे योग्य ठरणार नाही. प्रस्तावाती निवासी वापरासाठी ५०० रुपये प्रति गाळा शुल्क तसेच ११०,००० प्रति जलनि स्सारण जोडणी शुल्काचा उल्लेख आहे. त्यामुळे एकाच सेवेसाठी नागरिकांकडून दोन स्वतंत्र शुल्क आकारले जाणार आहेत का, याबाबत स्पष्टता आवश्यक आहे. नागरिकांवर दुहेरी आर्थिक भार पडणार नाही, याची स्पष्ट तरतूद प्रस्तावात असणे गरजेचे आहे.

निवेदनात म्‍हटले आहे की, शुल्काच्या माध्यमातून निधी जमा केला जाणार असल्यास सदर निधी कोणत्या कामासाठी, कोणत्या पद्धतीने आणि किती प्रमाणात खर्च केला जाणार आहे, याबाबत स्पष्ट व पारदर्शक यंत्रणा निश्चित करावी. नागरिक आधीच विविध कर, सेवा शुल्क आणि इतर आकारणीच्या माध्यमातून पालिकेला महसूल देत आहेत. अशा परिस्थितीत कोणतेही नवीन शुल्क लागू करण्यापूर्वी त्याची आवश्यकता, कायदेशीर आधार, शुल्करचना आणि नागरिकांवरील आर्थिक परिणाम यांचा सखोल विचार होणे आवश्यक आहे.