Devendra Fadnavis- पदं मागायला आलात, तर आधी रिपोर्ट कार्ड काढणार, असा इशारावजा दम मुख्यमंत्री देवेंद्र फडणवीस यांनी पुण्यातील प्रमुख पदाधिकारी आणि नगरसेवकांना दिला, तसेच त्यांच्याबद्दल नाराजीही व्यक्त केली. आगामी विधानपरिषद, पदवीधर आणि शिक्षक मतदारसंघाच्या निवडणुकांच्या प्रचाराचा आढावा घेण्यासाठी मुख्यमंत्र्यांनी पुणे आणि पिंपरी-चिंचवडच्या नगरसेवकांची आणि पदाधिकाऱ्यांची बैठक घेतली.

या वेळी त्यांनी नगरसेवकांची झाडाझडती घेतली, तसेच मतदानाचा टक्का वाढवण्याची जबाबदारी आणि नगरसेवकांच्या कामगिरीचा आढावा याबाबत बैठकीत चर्चा करण्यात आली. शिक्षक आणि पदवीधर मतदारसंघाच्या निवडणुकीच्या प्रचारात स्थानिक नगरसेवकांची उदासीनता लक्षात घेत, मुख्यमंत्र्यांनी उद्या माझ्याकडे पद मागायला याल,

तर सर्वात आधी तुमचे आधी रिपोर्ट कार्ड काढेन, तुम्ही किती आणि कसे काम केले, याचा आढावा घेऊन त्यानंतरच विचार करेन, असा थेट इशारा दिल्याचे समजते. अनेक पदाधिकारी आणि नगरसेवक प्रचारात उतरलेच नाहीत, प्रमुख पदाधिकाऱ्यांनीही या निवडणुकीकडे पाठ फिरवल्याचे बोलले जात आहे.

पक्षांतर्गतच एकमेकांवर कुरघोडी करण्याचे राजकारण सुरू असल्याने त्याचा फटका पक्षालाच बसणार असल्याने यामध्ये स्वत: मुख्यमंत्र्यांनी लक्ष घालण्याचे ठरवले आणि ते स्वत: तसेच प्रदेशाध्यक्ष रवींद्र चव्हाण यांनी पुण्यासह पश्चिम महाराष्ट्रात रणनीती आखण्यासाठी ठाण मांडले. बंडखोरांना थंड केले; परंतु अंतर्गत धुसफूस बाहेर येण्यास सुरुवात झाल्याने मुख्यमंत्र्यांना बैठका घ्याव्या लागत आहेत.

कोकणात ८० टक्के मतदान, पुण्यात का नाही?
या बैठकीत आगामी विधानपरिषद निवडणुकीतील मतदानाचा मुद्दाही चर्चिला गेला. कोकण विभागात ८० टक्के मतदान होत असेल, तर पुणे शहरात तेवढे मतदान का होऊ शकत नाही, असा सवाल मुख्यमंत्र्यांनी उपस्थित केल्याचे समजते. या वेळेला त्रुटी सुधार, जास्तीत जास्त मतदान घडवून आणा, असे सांगत मुख्यमंत्र्यांनी नगरसेवकांना मतदान वाढविण्यासाठी कामाला लागण्याचे आदेश दिले. त्यामुळे आता काहीच दिवस राहिलेल्या या निवडणुकीसाठी नगरसेवक चार्ज होतात का, हे पाहणे महत्त्वाचे ठरेल.