PCMC News – महागाईमुळे वैद्यकीय उपचारांचा खर्चही वाढला असून, महापालिकेच्या रुग्णालयांमध्ये उपचारासाठी येणाऱ्या रुग्णांची संख्या वाढत आहे. महापालिकेच्या रुग्णालयात अत्यल्प दरात उच्च गुणवत्तेचे उपचार मिळत असल्याने शहरातील गोर-गरीब रुग्णांसाठी महापालिकेची रुग्णालये मोठा आधार आहेत. केवळ शहरातीलच नव्हे तर राज्यभरातून रुग्ण शहरात उपचारासाठी येतात. यामुळे महापालिकेच्या रुग्णालयांवर ताण वाढत असताना उपचारानंतर बिल कमी करण्यासाठी किंवा संपूर्ण बिल माफ करण्यासाठी नगरसेवक व राजकीय लोकप्रतिनिधींकडून वैद्यकीय अधिकाऱ्यांवर दबाव टाकला जात असल्याची बाब समोर आली आहे. त्यामुळे अनेकदा नाईलाजाने बिलात सवलत द्यावी लागत असून, महापालिकेला आर्थिक फटका सोसावा लागत आहे. पिंपरी-चिंचवड महापालिकेच्या वैद्यकीय विभागाअंतर्गत नागरिकांना वैद्यकीय सुविधा पुरविण्यासाठी शहरात ३२ दवाखाने आहेत. तर, आठ रूग्णालये आहेत. शहराची वाढती लोकसंख्या विचारात घेता नागरिकांना घराजवळ आणि जलद उपचार मिळावेत, यासाठी आठ क्षेत्रीय कार्यालयांतर्गत ७९ नागरी आरोग्यवर्धिनी केंद्र आणि ३३ हिंदु हृदयसम्राट बाळासाहेब ठाकरे आपला दवाखाना उभारण्यात आले आहेत. शहरी भागातील अतिशय दाटीवाटीने वसलेला भाग ते झोपडपट्टी वस्तीपासून नागरी प्राथमिक आरोग्य केंद्राचे अंतर जास्त आहे. तसेच नागरी प्राथमिक आरोग्य केंद्रांच्या कामकाजाच्या अयोग्य वेळेमुळे, काही सर्वसामान्य नागरिक आरोग्य सेवांपासून वंचित राहत आहेत. त्यामुळे शहरातील अनेक भागात हे वैद्यकीय केंद्र उभारली आहेत. महापालिकेचे यशवंतराव चव्हाण स्मृती रुग्णालय (वायसीएम) तसेच, नवीन थेरगाव, नवीन भोसरी, नवीन जिजामाता, नवीन तालेरा, आकुर्डी, मासुळकर कॉलनीतील नेत्र रुग्णालय, सांगवी, यमुनानगर हे रुग्णालय आहेत. तसेच, अनेक दवाखाने आहेत. रुग्णालयात शहरातून तसेच, शहराबाहेरील रुग्ण उपचारासाठी येतात. तेथे मात्र माफक दरात उपचार केले जातात. वायसीएम रुग्णालय. असे असताना काही नगरसेवकांकडून रुग्णांचे बिल कमी करण्यासाठी संबंधित रुग्णालयाचे वैद्यकीय अधिकारी तसेच, महापालिकेच्या वैद्यकीय अधिकाऱ्यांना फोन करून दबाव टाकला जातो. बिल कमी करा किंवा पूर्णपणे माफ करा, असा आग्रह धरला जातो. त्यासाठी काही नगरसेवक सातत्याने फोन करून पाठपुरावा करतात. तसेच, खासदार व आमदारांच्या कार्यालयांतूनही रुग्णाचे बिल कमी करण्यासाठी वैद्यकीय अधिकाऱ्यांना फोन केले जातात. त्यामुळे महापालिकेला आर्थिक तोटा सहन करावा लागत आहे. स्वीय सहाय्यकांचाही रुबाब अनेकवेळा तर मंत्र्यांचे स्वीय सहाय्यकही फोन करून बिल कमी करण्याचे थेट आदेश देतात. लोकप्रतिनिधींच्या वाढत्या दबावामुळे वैद्यकीय अधिकाऱ्यांना नाइलाजास्तव बिल कमी करावे लागते. असे प्रकार नेहमीच होत असल्याने अगोदरच तोट्यात असलेले महापालिकेचे रुग्णालय आणखी तोट्यात जात आहे. परिणामी, रुग्णालय व दवाखान्यांवर दरवर्षी कोट्यवधींचा मोठ्या प्रमाणात खर्च करणे प्रशासनाला परवडत नसल्याचे खर्च आणि उत्पन्नाच्या आकडेवारीवरून स्पष्ट होत आहे. घराजवळ आरोग्य केंद्र सुरु महापालिकेच्या वैद्यकीय विभागांतर्गत शहराच्या विविध भागांमध्ये आठ मोठी रुग्णालये, २७ दवाखाने, २० आरोग्य केंद्र, ८ कुटुंब नियोजन केंद्र, ३६ लसीकरण केंद्र आहेत. ७५० खाटांच्या क्षमतेचे सर्वांत मोठे वायसीएम रुग्णालय, ४०० खाटांचे थेरगाव रुग्णालय, १०० खाटांचे नवीन भोसरी रुग्णालय, १३० खाटांचे नवीन आकुर्डी रुग्णालय आणि १२० खाटांचे नवीन जिजामाता रुग्णालय यासह एक हजार ५८९ खाटांची व्यवस्था महापालिकेच्या रुग्णालयात आहे. तरीही शहरातील प्रत्येक नागरिकांना प्राथमिक आरोग्य सुविधा वेळेवर आणि तत्काळ मिळावी म्हणून आरोग्यवर्धिनी केंद्र व आपला दवाखाने सुरु केले आहेत. “महापालिका रुग्णालयात खासगी रुग्णालयाच्या तुलनेत माफक दरात तसेच, दर्जेचार उपचार सुविधा दिल्या जातात. शहरातील तसेच, शहराबाहेरील हजारो रुग्ण महापालिका रुग्णालयात उपचार घेत आहेत. उपचार घेतल्यानंतर संबंधित रुग्णांचे बिल माफ करण्यासाठी नगरसेवकांचे फोन येतात. रुग्णांची आर्थिक क्षमता लक्षात घेऊन आवश्यकतेनुसार बिल कमी करण्याबाबत विचार केला जातो.” – डॉ. लक्ष्मण गोफणे, आरोग्य वैद्यकीय अधिकारी.
