Pay and Park – शहरातील वाहतूक कोंडी फोडण्यासह, मुख्य रस्त्यांवर चुकीच्या पद्धतीने होणाऱ्या पार्किंगला आळा घालण्यासाठी महापालिकेकडून शहराच्या मध्यवर्ती भागासह उपनगरांतील प्रमुख पाच रस्त्यांवर सशुल्क पार्किंग सुरू केले जाणार आहे. त्यासाठी मागविलेल्या फेरनिविदांना अखेर प्रतिसाद मिळला आहे. त्यानुसार पाचपैकी चार रस्त्यांवरील सशुल्क पार्किंगसाठी प्रत्येकी दोन अशा आठ निविदा प्राप्त झाल्याची माहिती प्रकल्प विभागाचे प्रमुख दिनकर गोजारे यांनी दिली. हा प्रस्ताव मान्य झाल्यास पुणेकरांना शहरात रस्त्यावर पार्किंगसाठी शुल्क मोजावे लागणार आहे. सध्या शहरात कोणत्याही रस्त्यावर असे शुल्क आकारले जात नाही. या पाच रस्त्यांमध्ये लक्ष्मी रस्ता, जंगली महाराज रस्ता- नामदार गोपाळकृष्ण गोखले रस्ता (एफसी रोड), बालेवाडी हायस्ट्रीट, विमाननगर व बिबवेवाडी येथील मुख्य रस्त्यांचा समावेश आहे. पुणे महापालिका सात वर्षे जुना प्रस्ताव शहरातील महत्त्वाच्या रस्त्यांवर सशुल्क पार्किंग आणण्यासंदर्भात सात वर्षांपूर्वी महापालिकेच्या सर्वसाधारण सभेमध्ये निर्णय झाला होता. मात्र, त्याची अंमलबजावणी झाली नव्हती. दरम्यान, महापालिका निवडणुकीपूर्वी प्रशासनाने शहरातील रस्त्यांवर सशुल्क पार्किंग करण्यासाठीची प्रक्रिया सुरू केली होती. दुचाकी वाहनांसाठी प्रतितास चार रुपये, तर चारचाकी वाहनांसाठी प्रतितास २० रुपये दर निश्चित केला होता. दररोज १४ तासांसाठी पार्किंग शुल्क आकारण्याचे निश्चित झाले होते. त्यानुसार निविदा प्रक्रिया राबविली होती. मात्र, त्या वेळी लक्ष्मी रस्ता व विमाननगर या दोन रस्त्यांसाठीच निविदा आल्याने प्रशासनाने फेरनिविदा काढली. अखेर त्याला प्रतिसाद मिळाल्याचे गोजारे यांनी स्पष्ट केले. स्थायीत मान्यता मिळणार का? महापालिकेत २०१९ मध्ये भारतीय जनता पक्षाची सत्ता होती. त्या कालावधीत हा प्रस्ताव आला होता. मात्र, सर्वच पक्षांनी विरोध केल्याने हा प्रस्ताव मागे ठेवला होता. मात्र, शहरातील कोंडी आणि मुख्य रस्त्यावर चुकीच्या पद्धतीने होणाऱ्या पार्किंगमुळे प्रशासनाने निवडणुकीपूर्वी या कामाच्या निविदा काढल्या होत्या. आता हा प्रस्ताव पुन्हा मान्यतेसाठी स्थायी समितीत आल्यानंतर भाजपची काय भूमिका असणार, तसेच विरोधीपक्ष काय भूमिका घेणार, यावर हा पार्किंग शुल्काचा निर्णय अवलंबून असणार आहे.
