Patas News – पाटस हद्दीत बेकायदा कोळसा भट्टीवर दौंड वनविभागाच्या पथकाने छापा टाकून अंदाजे १ लाख २० हजार रुपये किमतीचा मुद्देमाल जप्त केल्याची माहिती दौंड वनविभागाचे वनपरिक्षेत्र अधिकारी राहुल काळे यांनी दिली आहे. पाटस परिसरातील तामखडा, मोहिते वस्ती, जगदाळे वस्ती तसेच गार फाटा परिसरात शेतकऱ्यांच्या खासगी क्षेत्रातील झाडांची कत्तल करून बेकायदा कोळसा भट्ट्या लावून त्याचा कोळसा तयार केला जात होता.

बेकायदा कोळसा पुणे तसेच दौंड तालुक्यातील कुरकुंभ येथील औद्योगिक वसाहतीमधील कंपन्यांना पुरवठा केला जात आहे. रात्रंदिवस हा व्यवसाय खुलेआम सुरू असून स्थानिक वनअधिकारी जाणीवपूर्वक दुर्लक्ष करत असल्याने याबाबत नागरिकांनी थेट पुणे वनविभागाचे सहाय्यक वनसंरक्षक अतुल जैनिक यांच्याकडे तक्रार केली होती.

याची तातडीने दखल घेत दौंड वनविभागाच्या कर्मचाऱ्यांना बेकायदेशीर खाणीवर कारवाई करण्याचे आदेश दिले होते. सहायक वनसंरक्षक जैनिक यांच्या मार्गदर्शनाखाली दौंड वनविभागाचे पाटस, यवत, राहू येथील वनरक्षक आणि वनकर्मचारी यांच्या पथकाने बुधवारी (दि.२७) रात्री अचानक छापा टाकला. यावेळी पाटस परिसरातील एका प्रतिष्ठित राजकीय व्यक्तींच्या नातेवाईकांच्या शेतीतील काटेरी झाडांची मोठी कत्तल केली आहे.

विनापरवाना बेकायदेशीर कोळसा बट्ट्या लावलेले असल्याचे आढळले. यावेळी घटनास्थळी कोळशांनी भरलेल्या ९५ ते १०० पिशव्या आढळल्या. साहित्य असा १ लाख २० हजार रुपये किमतीचा मुद्देमाल जप्त केला आहे. घटनास्थळी भट्टी मालक आढळले नाहीत. वन कायद्यान्वये गुन्हा दाखल करण्याची प्रक्रिया सुरू केली आहे.