Leopard Rescue – आंबेगाव तालुक्यातील नागापूर-वळती फाटा परिसरात गेल्या काही महिन्यांपासून नागरिकांमध्ये भीतीचे वातावरण निर्माण करणारी बिबट मादी अखेर सोमवारी (दि. 11) पहाटे विहिरीत पडल्याने वनविभागाच्या ताब्यात आली. वनविभागाच्या पथकाने स्थानिक ग्रामस्थांच्या मदतीने रेस्क्यू ऑपरेशन राबवत तिला सुरक्षित बाहेर काढले. नागापूर परिसरातील ढोलेमळा आणि वळती फाटा भागात बिबट्याचा वारंवार वावर आढळत होता. विशेषतः रात्रीच्या वेळी दुचाकीस्वारांना बिबट्याचे दर्शन होत असल्याने परिसरात भीतीचे वातावरण निर्माण झाले होते. वनविभागाने या भागात पिंजरे लावून बिबट्याला पकडण्याचे प्रयत्न सुरू ठेवले होते; मात्र बिबट सतत वनकर्मचार्यांना चकवा देत होता. सोमवारी पहाटे शिकारीच्या शोधात असताना ही बिबट मादी सूर्यकांत दळे यांच्या सामायिक विहिरीत पडली. सकाळी शेतमजूर गणेश तळपे यांना विहिरीतून हालचाल आणि पाण्याचा आवाज ऐकू आल्याने त्यांनी पाहणी केली असता विहिरीत बिबट असल्याचे दिसून आले. त्यांनी तातडीने शेतमालक डॉ. संजय भोर यांना माहिती दिली. त्यानंतर पोलीस पाटील संजय पोहकर यांच्या माध्यमातून वनविभागाशी संपर्क साधण्यात आला. माहिती मिळताच मंचर वनपरिक्षेत्र अधिकारी विकास भोसले, वनपाल आर. एम. फुलमाळी, वनरक्षक बालाजी पोतरे आणि रेस्क्यू पथक घटनास्थळी दाखल झाले. दोरांच्या सहाय्याने पिंजरा विहिरीत उतरवण्यात आला. काही वेळाने बिबट मादी पिंजर्यात शिरताच तिला सुरक्षितपणे बाहेर काढण्यात आले. वनविभागाच्या माहितीनुसार पकडण्यात आलेली बिबट मादी अंदाजे दोन वर्षांची असून पुढील उपचार आणि निगेसाठी तिला वन उद्यानात हलविण्यात आले आहे. या कारवाईमुळे परिसरातील ग्रामस्थांनी समाधान व्यक्त केले असून शेतकरी व दुचाकीस्वारांनी सुटकेचा निःश्वास सोडला आहे.
