प्रभात वृत्तसेवा
पुणे – बॅगेमध्ये बेहिशोबी ५१ लाख घेऊन जाताना रेल्वे सुरक्षा बलाने (आरपीएफ) पुणे स्थानकावर ही रक्कम जप्त केली असून पुढील तपास आयकर विभाग करत आहे.आरपीएफच्या माहितीनुसार २० सप्टेंबर रोजी रेल्वे स्थानकाचा सरकता जिना चढून गेल्यावर पादचारी पुलावर बॅगेचे स्कॅनिंग केले. त्यात संशयीत वस्तू आढळल्यामुळे तपासणी केल्यावर जांभळ्या रंगाच्या बॅगेत २२ लाख आणि लाल रंगाच्या बॅगेत २९ लाख अशी ५१ लाखांची रोकड सापडली.

त्याबाबत प्रवाशाला विचारणा केली असता, तो योग्य खुलासा करू शकला नाही. त्यामुळे आयकर विभागाशी संपर्क साधला. वरिष्ठ विभागीय सुरक्षा आयुक्त आणि सहाय्यक सुरक्षा आयुक्त, पुणे यांच्या मार्गदर्शनाखाली ही कारवाई करण्यात आली. आरपीएफ निरीक्षक सुनील कुमार यादव यांच्या नेतृत्वाखाली एएसआय प्रदीप चौधरी, एएसआय संतोष जायभाये, एएसआय विलास दराडे, एएसआय संतोष पवार, एमएसएफ स्टाफ कृष्णा भांगे यांनी ही कामगिरी केली.

“रेल्वे स्थानक किंवा गाडीमध्ये संशयास्पद हालचाली दिसल्यास तात्काळ हेल्पलाइन क्रमांक १३९ किंवा जवळच्या आरपीएफ केंद्राशी संपर्क साधावा. प्रवाशांची सुरक्षा आमची प्राथमिकता आहे. रेल्वे प्रवास करताना मोठी रोकड किंवा मौल्यवान वस्तू सोबत ठेवू नये.”
– सुनील यादव, आरपीएफ निरीक्षक, पुणे रेल्वे स्थानक