पुणे – वाढते नागरीकरण, व्यावसायिक अस्थापनांमुळे मार्केट यार्ड, बिववेवाडी परिसरात गेल्या काही वर्षात वाहतूक कोंडीची समस्या वाढली आहे. ही वाहतुकीची कोंडी सोडविण्यासाठी गंगाधाम चौकात एकात्मिक वाहतूक नियोजन प्रकल्प राबविण्यात येत असल्याची माहिती पर्वती विधानसभा मतदारसंघातील विधानसभेच्या भाजप, महायुतीच्या उमेदवार आमदार माधुरी मिसाळ यांनी दिली.

मिसाळ यांच्या प्रचारार्थ आज प्रेमनगर, आंबेडकर नगर परिसरात प्रचारफेरीचे आयोजन करण्यात आले होते. माजी नगरसेविका मानसी देशपांडे, अनुसया चव्हाण, मनोज देशपांडे, प्रीतम नागपुरे, आशा बिबवे, विजय आल्हाट, बसू गायकवाड, सुनीता मोरे, संजय गावडे, शिवम देशपांडे, ज्ञानेश्वर मानकर, शकील शेख, प्रसाद देशपांडे, उषा साळवे, तुकाराम खंडागळे, ब्रम्हा मिसाळ, चेतन क्षीरसागर, आप्पा गाढवे, नवनाथ वांजळे, गायत्री कांबळे उपस्थित होत्या.

आमदार मिसाळ म्हणाल्या, मार्केट यार्डमध्ये येणाऱ्या अवजड वाहनांमुळे मोठ्या प्रमाणात वाहतुकीची कोंडी होते. ती सोडविण्यासाठी गंगाधाम चौकात उड्डाणपूल, भुयारी मार्ग आणि कात्रजहून बिबवेवाडीकडे जाण्यासाठी स्वतंत्र २४ मीटर रस्त्याचे नियोजन करण्यात आले आहे.

बिबवेवाडी ते कोंढवा रस्त्यावर ५२० 0 मीटर लांबीचा आणि १६ मीटर रुंदीचा उड्डाणपूल उभारण्यात येणार आहे. आई माता मंदिर ते मार्केट यार्ड या दरम्यान ४६० मीटर लांबीचा आणि साडेतेरा मीटर रुंदीचा ग्रेड सेपरेटर आणि आई माता मंदिर ते झाला कॉम्प्लेक्स दरम्यान२४ मीटरचा स्वतंत्र रस्ता होणार आहे. या प्रकल्पाला ९३ कोटी रुपयांचा निधी अपेक्षित आहे.

या शिवाय, या भागासाठी अडॅप्टिव्ह ट्रॅफिक मॅनेजमेंट सिस्टीम एटीएमस ही अत्याधुनिक, स्वयंचलित वाहतूक सिग्नल प्रणाली प्रमुख रस्त्यांवर कार्यान्वित करण्यात आली आहे त्यामुळेही कोंडी काही प्रमाणात कमी झालेली आहे.