मुंबई : काही महिन्यांपूर्वी बदलापूर येथील शाळेतील अल्पवयीन मुलीवरील अत्याचार प्रकरणातील आरोपी अक्षय शिंदे याचा पोलिसांकडून एन्काऊंटर करण्यात आला होता. आता या प्रकरणात एक मोठी अपडेट समोर आली आहे. अक्षय शिंदे याचे पालक गेल्या दीड महिन्यापासून बेपत्ता असून ते वकिलांच्याही संपर्काबाहेर असल्याची माहिती समोर आली आहे. यामुळे एकच खळबळ उडाली आहे.

बदलापूर अल्पवयीन विद्यार्थिनींवरील अत्याचार प्रकरणातील आरोपी अक्षय शिंदे याच्या एन्काउंटरची एसआयटी चौकशीचे आदेश न्यायालयाने दिले होते. मात्र या आदेशानंतर अक्षयचे पालक अचानक संपर्काबाहेर गेले आहेत. अक्षय शिंदे एन्काऊंटर प्रकरणात न्यायालयात दाद मागण्यासाठी शिंदे यांच्या पालकांनी वकील अमित कटरनवरे यांची नेमणूक केली होती. मात्र, केस लढण्याची इच्छा नसल्याचे कोर्टात सांगितल्यानंतर आता पालक त्या वकिलांच्याही संपर्कात नाहीत.

अक्षय शिंदे याचे घर कुलूपबंद आढळल्याची माहिती समोर आली आहे. अंबरनाथमध्ये मावशीकडे वास्तव्यास असलेले अक्षय शिंदे याचे पालक तेथूनही निघून गेले आहेत. गेल्या तब्बल दीड महिन्यांपासून शिंदे याचे पालक कुठे आहेत याची कोणालाही माहिती नाही, ते नेमके कुठे गेले, कसे आहेत, याची कोणालाच काहीही कल्पना नाही. त्यामुळे आता हे प्रकरण पुन्हा एकदा चर्चेत आले आहे.

अक्षय शिंदे एन्काउंटर प्रकरणी काल (दि. ०७) हायकोर्टात सुनावणी पार पडली. या बनावट एन्काउंटर मधील सबंधित पोलीस अधिकाऱ्यांवर गुन्हा दाखल करण्याचे आदेश कोर्टाकडून राज्य सरकारला देण्यात आले. अक्षय शिंदेचे वडील अण्णा शिंदे यांनी पोलिसांवर आरोप करत याचिका दाखल केली होती. त्यावर हायकोर्टात मागील काही महिन्यांपासून सुनावणी सुरू होती. अखेर हायकोर्टाने आज राज्य सरकारला संबंधित पोलीस अधिकाऱ्यांच्या निलंबनाचे आदेश दिले आहेत.

बदलापूर अत्याचार प्रकरण नेमकं काय?

बदलापूरमध्ये काही महिन्यांपूर्वी एका शाळेत दोन अल्पवयीन मुलींवर लैंगिक अत्याचार झाल्याचा प्रकार समोर आला होता. या घटनेनंतर संपूर्ण बदलापूरमधील नागरिक आक्रमक झाले होते. ही घटना समोर आल्यानंतर नागरिकांनी संबंधित शाळेच्या बाहेर येऊन आंदोलन केले होते. तर काही आंदोलकांनी बदलापूर रेल्वे स्थानकावर जाऊन रेल्वे रोखून धरल्या होत्या. सकाळी चालू झालेले हे आंदोलन संध्याकाळापर्यंत चालले होते.

या प्रकरणातील आरोपी अक्षय शिंदेला (Akshay Shinde Encounter) आत्ताच्या आता फाशीची शिक्षा द्यावी, अशी मागणी जनतेने केली होती. शाळेतील सफाई कर्मचारी अक्षय शिंदेने हे घृणास्पद कृत्य केले होते. त्याच्यावर लहान मुलांना स्वच्छतागृहात घेऊन जाण्याची जबाबदारी सोपवण्यात आली होती.