Paper Leak Scam – दहावी-बारावी बोर्ड परीक्षांचे पेपर मिळवून देण्याचे आमिष दाखवत विद्यार्थ्यांना फसविणाऱ्यास शिवाजीनगर पोलिसांनी अटक केली आहे. आरोपी टेलिग्रामवर ग्रुप तयार करून क्यूआर कोडद्वारे पैसे मागत असे. पोलिसांनी तांत्रिक तपासादरम्यान टेलिग्राम कंपनीशी ई-मेलद्वारे पत्रव्यवहार करून संशयिताचा शोध घेतला. तपासातून आरोपीचे बँक खात्याशी संबंधित तपशील मिळाल्यानंतर पोलीस चंद्रपूरला गेले. यावेळी चैतन्य विनोद शेंडे ( १८, रा. जातपुरा, चंद्रपूर) याने टेलिग्रामवर महाराष्ट्र स्टेट बोर्ड २०२६ पेपर्स नावाचा ग्रुप तयार केल्याचे उघड झाले. या ग्रुपवर बोर्डाच्या पेपरची पीडीएफ टाकत असल्याचा बनाव करून फाइल अपलोड करत असे. या फाइलला पासवर्ड असे. पेपर मिळवण्यासाठी इच्छुकांना क्यूआर कोड पाठवून प्रती पेपर ६०० रुपये यूपीआयद्वारे पैसे मागत असे. तपासात chaitanya03@fam तसेच फोनपेवरील दुसऱ्या यूपीआय आयडीद्वारे व्यवहार होत असल्याचे निष्पन्न झाले. संबंधित खात्याची माहिती घेतली असता ते खाते चैतन्य शेंडेच्या नावावर असल्याचे स्पष्ट झाले. अशी करायचा फसवणूक फसवणुकीसाठी आरोपी आधी एक पीडीएफ फाइल अपलोड करत असे. दुसऱ्या दिवशी झालेला खरा पेपर त्या फाइलमध्ये एडिट करून अपलोड करत असल्याने फाइलची वेळ पूर्वीचीच दिसत होती. त्यामुळे विद्यार्थ्यांना पेपर आधीच उपलब्ध असल्याचा भास निर्माण होत होता. काहीजणांकडून पैसे मिळाल्यानंतर आरोपी त्यांना ब्लॉकही करत होता. या प्रकरणात आरोपीने किती विद्यार्थ्यांची फसवणूक केली आहे याचा तपास सुरू आहे. ही कारवाई पोलीस आयुक्त अमितेश कुमार, सहपोलीस आयुक्त रंजन कुमार शर्मा, अपर पोलीस आयुक्त राजेश बनसोडे, पोलीस उपायुक्त ऋषिकेश रावले, सहायक पोलीस आयुक्त चंद्रकांत भोसले यांच्या मार्गदर्शनाखाली शिवाजीनगर पोलीस ठाण्याचे वरिष्ठ पोलीस निरीक्षक गिरीशकुमार दिघावकर व त्यांच्या पथकाने केली. “संबंधीत प्रकरणात चंद्रपूर जिल्ह्यातील एका तरूणाला अटक केली आहे. तांत्रिक पध्दतीने त्याने हा प्रकार केला आहे. याप्रकरणी त्याच्याकडे आणखी तपास सुरू आहे.” – कृषीकेश रावले, पोलीस उपायुक्त, परिमंडल एक
