Shikrapur on Pune road : आज संत श्री ज्ञानेश्वर माऊलींचा पालखी सोहळा सायंकाळी आळंदीतून पंढरपूरच्या दिशेने प्रस्थान ठेवणार आहे. त्यामुळे आळंदीत लाखो वारकऱ्यांची गर्दी पाहायला मिळत आहे. अशातच एक दुःखद घटना समोर आली आहे. पुणे रस्त्यावर शिक्रापूरजवळ एका वाकऱ्याचा एसटीच्या धडकेत मृत्यू झाला आहे.

निवृत्ती सांडू माकोसे (वय ४७) असे मृत पावलेल्या वारकऱ्याचे नाव आहे. ट्रॅक्टर दुरुस्त करण्यासाठी साहित्य आणायला जात असताना हा अपघात झाला असल्याची प्राथमिक माहिती मिळत आहे. दिंडीसोबत पाण्याचा टँकर घेऊन जात असताना एसटीची धडक माकोसे यांनी बसली.

नेमका अपघात कसा घडला?

मिळालेल्या माहितीनुसार, बुधवारी पहाटे निवृत्ती सांडू माकोसे हे आळंदीच्या दिशेने पाण्याचा टँकर घेऊन निघाले होते. ते पुणे रस्त्यावर टँकर घेऊन आल्यावर शिक्रापूरजवळ त्यांच्या ट्रॅकरचे चाक खराब झाले. चाक दुरस्ती करण्यासाठी काही सामान त्यांना हवे होते, म्हणून ते आणि त्यांचे दोन सहकारी रस्ता ओलांडून जात होते.

त्याचवेळी अचानक भरधाव वेगाने आलेल्या एसटीने त्यांना जोराची धडकी दिली. या अपघातात निवृत्ती माकोसे हे गंभीर जखमी झाले. त्यांना तातडीने रुग्णालयात नेण्यात आले. मात्र, त्यांना डॅाक्टारांनी मृत घोषित केले. तर त्यांच्यासोबत असणारे सहकारी या अपघातातून थोडक्यात बचावले आहेत. या घटनेमुळे दिंडीतील वारकऱ्यांमध्ये शोक पसरला आहे.

निवृत्ती माकोसे यांच्या निधनाने त्यांच्या कुटुंबावर दुःखाचा डोंगर कोसळला आहे. या घटनेममुळे परिसरात शोक व्यक्त केला जात आहे. माकोसे यांच्या पश्चात पत्नी, दोन मुली, दोन मुले आणि भाऊ असा परिवार आहे. ते किशोर गावचे रहिवासी होते.

हेही वाचा! राज ठाकरेंना वळवण्यासाठी शिंदेंचा मास्टरप्लॅन! फडणवीसांनंतर आता ‘या’ नेत्यावर खास जबाबदारी, ठाकरे बंधूंच्या युतीला धक्का?