Smriti Mandhana to get married : भारतीय महिला क्रिकेट संघाची उपकर्णधार आणि सलामीवीर स्मृती मंधाना लवकरच लग्नबंधनात अडकणार असल्याची मोठी बातमी समोर आली आहे. इंदूर येथे सुरू असलेल्या महिला वनडे विश्वचषक 2025 मधील भारत-इंग्लंड सामन्यापूर्वी स्मृतीचा प्रियकर आणि बॉलिवूड संगीत दिग्दर्शक पलाश मुच्छल याने या लग्नाची घोषणा केली. या खुलाशाने स्मृतीच्या चाहत्यांमध्ये उत्साहाचे वातावरण निर्माण झाले आहे. स्मृती मंधाना लवकरच इंदूरची सून होणार – कर्णधार हरमनप्रीत कौरच्या नेतृत्वाखाली भारतीय महिला संघ विश्वचषकात उपांत्य फेरी गाठण्यासाठी जोरदार प्रयत्न करत आहे. यंदाच्या विश्वचषकात स्मृती मंधाना अद्याप पूर्ण फॉर्मात दिसलेली नाही, परंतु ऑस्ट्रेलियाविरुद्धच्या सामन्यात तिने चांगली फलंदाजी करत फॉर्मात परतण्याचे संकेत दिले आहेत. इंदूर येथील इंग्लंडविरुद्धच्या सामन्यात तिच्याकडून मोठ्या खेळीची अपेक्षा होती आणि तिने खेळलीसुद्धा तरी संघाला पराभवाचा सामना करावा लागला. विशेषत: आता ती लवकरच इंदूरची सून होणार असल्याने चाहत्यांची उत्सुकता शिगेला पोहोचली आहे. पलाश मुच्छलने केले जाहीर – पलाश मुच्छलने स्मृतीसोबतच्या नात्याबद्दल बोलताना सांगितले, “स्मृती लवकरच इंदूरची सून होणार आहे. मी आता एवढेच सांगेन. मी तुम्हाला हेडलाइन दिली आहे.” 30 वर्षीय पलाश हा इंदूरचा रहिवासी असून, तो त्याची मोठी बहीण पलक मुच्छल यांच्यासह बॉलिवूड चित्रपटांसाठी संगीत दिग्दर्शनासाठी प्रसिद्ध आहे. सध्या तो ‘राजू बाजेवाला’ या चित्रपटाचे दिग्दर्शन करत असून, यात अविका गोर आणि चंदन रॉय मुख्य भूमिकेत आहेत. हेही वाचा – Ranji Trophy 2025 : तुषार देशपांडे बेशुद्ध पडला, तरी रणजीत मुंबईला विजय मिळवून दिला! स्मृती मंधाना सांगलीची रहिवासी – 29 वर्षीय स्मृती मंधाना ही महाराष्ट्रातील सांगली येथील असून, गेल्या दशकाहून अधिक काळ ती भारतीय महिला क्रिकेट संघाची प्रमुख खेळाडू आहे. स्मृती आणि पलाश गेल्या काही वर्षांपासून रिलेशनशिपमध्ये असून, त्यांनी सोशल मीडियावर अनेकदा त्यांच्या नात्याची झलक दाखवली आहे. मात्र, आतापर्यंत त्यांच्या लग्नाबाबत कोणतीही अधिकृत चर्चा झाली नव्हती. पलाशच्या या घोषणेने त्यांच्या लग्नाबाबतच्या चर्चांना पूर्णविराम मिळाला आहे. हेही वाचा – R Ashwin : अभिषेक-बुमराह अन् सॅमसनचा नंबर मागणाऱ्या नकली झाम्पाची अश्विनने अशी घेतली फिरकी, पाहा VIDEO स्मृतीच्या नव्या इनिंगची उत्सुकता – भारतीय संघाने विश्वचषकात चांगली सुरुवात केली, परंतु दक्षिण आफ्रिका, ऑस्ट्रेलिया आणि इंग्लंडविरुद्धचे सलग तीन सामने गमावले. आता सेमीफायनलमध्ये पोहोचण्यासाठी त्यांना उर्वरित दोन्ही सामन्यात विजय आवश्यक आहे. मात्र, स्मृतीच्या वैयक्तिक आयुष्यातील या आनंददायी बातमीने तिच्या चाहत्यांमध्ये उत्साह निर्माण झाला असून, तिच्या मैदानावरील आणि मैदानाबाहेरील नव्या इनिंगची सर्वांना उत्सुकता आहे.
