India U19 Squad : टी-२० वर्ल्ड कपसाठी टीम इंडियाचं मिशन सुरू! इंग्लंडविरुद्धच्या मालिकेसाठी भारतीय संघ जाहीर
India U19 Squad Announce : बीसीसीआयने इंग्लंडविरुद्धच्या पाच टी-२० सामन्यांच्या मालिकेसाठी १५ सदस्यीय भारतीय १९ वर्षांखालील महिला संघाची घोषणा केली आहे. भाविका अहिरे कर्णधार आणि अनादी तागडे उपकर्णधार असतील.

India U19 Women Squad Announce : आयसीसी अंडर-१९ महिला टी-२० विश्वचषक २०२७ च्या तयारीला धार देण्यासाठी भारतीय संघ आता सज्ज झाला आहे. भारतीय क्रिकेट नियामक मंडळाने (BCCI) इंग्लंडच्या अंडर-१९ महिला संघाविरुद्ध होणाऱ्या पाच सामन्यांच्या टी-२० मालिकेसाठी १५ सदस्यीय भारतीय संघाची घोषणा केली आहे. या महत्त्वाच्या मालिकेत भारतीय संघाचे नेतृत्व भाविका अहिरे हिच्याकडे सोपवण्यात आले असून, अनादी तागडे हिची उपकर्णधार म्हणून निवड करण्यात आली आहे.
वडोदरा आणि सूरतमध्ये रंगणार पाच सामन्यांचा थरार –
बीसीसीआयच्या महिला निवड समितीने शनिवारी या संघाची निवड जाहीर केली. भारत आणि इंग्लंडच्या युवा महिला संघांमधील ही मालिका २६ नोव्हेंबर ते ६ डिसेंबर दरम्यान खेळवली जाणार असून, याचे सर्व सामने गुजरातमधील वडोदरा आणि सूरत येथे आयोजित केले जातील. भाविका अहिरे कर्णधारपदासोबतच यष्टीरक्षणाची जबाबदारीही पार पाडेल, तर श्रेया एस. चव्हाण हिचा दुसरी यष्टीरक्षक म्हणून संघात समावेश करण्यात आला आहे.
विश्वचषक तयारीच्या दृष्टीने अत्यंत महत्त्वाची मालिका –
जानेवारी २०२७ मध्ये होणाऱ्या आयसीसी अंडर-१९ महिला टी-२० विश्वचषकापूर्वी खेळाडूंना आपली तयारी तपासण्याची ही एक सुवर्णसंधी असणार आहे. इंग्लंडसारख्या बलाढ्य संघाविरुद्ध खेळताना संघाचे अचूक संयोजन, खेळाडूंचा फॉर्म आणि मैदानावरील दबाव हाताळण्याच्या क्षमतेचे मूल्यमापन केले जाईल. या मालिकेत इरा जाधव, निधी महतो, पूर्वा सिवाच, मेहक नरवसे आणि मैत्री मनियार यांसारख्या अनेक प्रतिभावान युवा खेळाडूंना आपली चमक दाखवण्याची संधी मिळाली आहे.
🚨 News 🚨
India U19 squad announced for T20 series at home against England U19
Details 🔽
https://t.co/OwS62ybqW6
— BCCI Women (@BCCIWomen) November 21, 2026
भारत १९ वर्षांखालील विरुद्ध इंग्लंड १९ वर्षांखालील महिला टी२० आंतरराष्ट्रीय मालिकेचे वेळापत्रक:
- २६ नोव्हेंबर: पहिला टी-२० सामना, वडोदरा (सायंकाळी ६ वाजता)
- २८ नोव्हेंबर: दुसरा टी-२० सामना, वडोदरा (दुपारी १ वाजता)
- १ डिसेंबर: तिसरा टी-२० सामना, सुरत (सायंकाळी ६ वाजता)
- ३ डिसेंबर: चौथा टी-२० सामना, सुरत (सायंकाळी ६ वाजता)
- ६ डिसेंबर: पाचवा टी-२० सामना, सुरत (दुपारी १ वाजता)
इंग्लंडविरुद्धच्या मालिकेसाठी भारताचा १५ सदस्यीय संघ :
भाविका अहिरे (कर्णधार आणि यष्टीरक्षक), अनादी तागडे (उपकर्णधार), इरा जाधव, निधी महतो, पूर्वा सिवाच, मेहक नरवसे, मैत्री मनियार, ईश्वरी अवसारे, दीया यादव, श्रेया एस. चव्हाण (यष्टीरक्षक), समायरा राघव, कुमारी पलक, उमा काश्वी, अचसा परमार आणि पलक सिंग.





