Pakistan – पाकिस्तानमधील दहशतवाद विरोधी न्यायालयाने विद्यापीठामध्ये शिकणाऱ्या एका विद्यार्थ्याला अडीच वर्षांच्या तुरुंगवासाची शिक्षा सुनावली आहे. सोशल मीडियावरून बॉम्ब बनवण्याची कृती शिकल्याचा आरोप या विद्यार्थ्यावर होता, असे अधिकाऱ्यांनी सांगितले. हनान अब्दुल्लाह असे या विद्यार्थ्याचे नाव असून त्याला ५० हजार रुपयांचा दंड देखील ठोठावण्यात आला आहे.

हनान अब्दुल्लाह हा पंजाब प्रांतातल्या नारोवाल विद्यापीठामध्ये मनुष्यबळ विकास विषयाचा अभ्यास करत आहे. त्याला राष्ट्रीय तपास पथकाने २०२२ मध्ये इंटरनेटवर बॉम्ब बनवण्याची कृती शोधण्याच्या आरोपाखाली अटक केली होती. इराकमधील व्यक्तींशी फेसबुक आणि इन्स्टाग्रामच्या माध्यमातून त्याने ही कृती शोधण्याचा प्रयत्न केला होता.

या संदर्भात त्याने फेसबुकद्वारे दहशतवाद्यांशी आणि बंदी घातलेल्या संघटनेशी संपर्क प्रस्थापित केला होता, असे देखील एफआयए अधिकाऱ्याने सांगितले. त्याने बॉम्ब बनवण्याची प्राथमिक माहिती मिळवली होती आणि स्फोटकांच्या सहाय्याने बॉम्ब बनवण्याची तयारी देखील केली होती.

आपण ही कृती केवळ उत्सुकतेपोटी शिकण्याचा प्रयत्न केल्याचे या विद्यार्थ्याने न्यायालयात सांगितले. अब्दुल्लाह याला २०२३ मध्ये जामीन मिळाला असून शिक्षा सुनावल्यानंतर त्याला पुन्हा अटक करण्यात आली.