Razaullah Khan Blasts 9 Sixes On Debut In England Test Equalling Tim Southee World Record : इंग्लंड आणि पाकिस्तान संघातील तीन सामन्यांच्या कसोटी मालिकेतील शेवटचा सामना एजबॅस्टन येथे पार पडला. या सामन्यात इंग्लडने पाकिस्तान ८ विकेट्सनी धूळ चारत मालिका ३-० ने खिशात घातली. मात्र, इंग्लंडच्या विजयापेक्षा पाकिस्तानच्या पदार्पणवीर रझाउल्लाह खान (Razaullah Khan) याची चर्चा जास्त होत आहे. त्याने नवव्य क्रमांकाला फलंदाजी तुफानी फटकेबाजी करत एका खास विश्वक्रमाची बरोबरी केली आहे.

टिम साऊदीच्या ऐतिहासिक विक्रमाची केली बरोबरी!

२१ वर्षीय रझाउल्लाह खानने इंग्लंडच्या वेगवान माऱ्याची पिसं काढत ६३ चेंडूंत ९ उत्तुंग षटकारांसह ८१ धावांची तुफानी खेळी साकारली. या खेळीच्या जोरावर त्याने १८ वर्षे जुन्या जागतिक विक्रमाशी बरोबरी केली. पाकिस्तानचा संघ ७ बाद ३१२ अशा नाजूक स्थितीत असताना रझाउल्लाह मैदानात उतरला. त्याने पहिल्या चेंडूपासूनच प्रतिहल्ला चढवत अवघ्या ६३ चेंडूंत ४ चौकार आणि ९ षटकार खेचले. या वादळी खेळीसह त्याने न्यूझीलंडच्या टिम साऊदीच्या २००८ मधील १८ वर्षे जुन्या विक्रमाची बरोबरी केली. साऊदीनेही इंग्लंडविरुद्ध पदार्पणात ९ षटकार ठोकले होते. कसोटी क्रिकेटच्या इतिहासात नवव्या क्रमांकावर फलंदाजी करताना पदार्पणात इतके षटकार ठोकणारा रझाउल्लाह दुसराच फलंदाज ठरला आहे.

पर्वतात होता फोन नॉट रिचेबल; संघात निवड झाली तेव्हा नव्हता पासपोर्ट!

Pakistan’s pride saving debutant Razaullah speaks after a sensational 81-run knock. pic.twitter.com/pQhzM5DgIe

— Broad Peak (@GashabrumII) September 12, 2026

पेशावरच्या या मध्यमगती गोलंदाजाची संघात निवड होण्याची कहाणी एखाद्या चित्रपटासारखी रंजक आहे. लॉर्ड्स कसोटीतील लाजिरवाण्या पराभवानंतर ७ खेळाडूंना वगळण्यात आले, तेव्हा रझाउल्लाहला अचानक संघात पाचारण करण्यात आले. गंमत म्हणजे, त्याला निवडीची कल्पनाही नव्हती आणि त्याच्याकडे इंग्लंडचा पासपोर्टही नव्हता. निवड समितीने संपर्क साधण्याचा प्रयत्न केला असता त्याचा फोन लागत नव्हता; कारण तो खैबर पख्तुनख्वाच्या दुर्गम डोंगरभागात होता. अखेर प्रशिक्षकांच्या मदतीने त्याला गाठून घाईघाईने पासपोर्ट आणि व्हिसा तयार करून इंग्लंडला पाठवण्यात आले.

हेही वाचा – IND vs AFG : जिओहॉटस्टार किंवा सोनीवर नाही, ‘या’ ओटीटी प्लॅटफॉर्मवर होणार IND vs AFG टी-२० मालिकेचे थेट प्रक्षेपण

पहिल्या डावात १३३; पण रझाउल्लाहच्या वादळाने ठोकल्या ४४९ धावा!

पहिल्या डावात अवघ्या १३३ धावांत खुर्दा झालेल्या पाकिस्तानी संघाने रझाउल्लाहच्या या ऐतिहासिक आणि आक्रमक डावाच्या बळावर दुसऱ्या डावात ४४९ धावांचा डोंगर उभारला. यामुळे पाकिस्तानने १२९ धावांची महत्त्वपूर्ण आघाडी घेत इंग्लंडसमोर विजयासाठी १३० धावांचे आव्हान ठेवले होते. मात्र यजमान इंग्लंडने संघाने २ गडी गमावून विजयावर शिक्कामोर्तब केला. मात्र, या नवख्या खेळाडूच्या धाडसी खेळीने क्रिकेटजगताला थक्क केले आहे.