Pakistan vs England Test Series : पाकिस्तान आणि इंग्लंड यांच्यात तीन सामन्यांची कसोटी मालिका होणार आहे. या मालिकेस 7 ऑक्टोबरपासून प्रारंभ होणार आहे. ही मालिका फक्त पाकिस्तानमध्ये खेळवली जाणार आहे. पण आता याबाबत एक महत्त्वाची माहिती समोर आली आहे. एका रिपोर्टनुसार, पाकिस्तान-इंग्लंड मालिकेचे ठिकाण बदलले जाऊ शकते. ही कसोटी मालिका UAE किंवा श्रीलंकेत आयोजित केली जाऊ शकते. चॅम्पियन्स ट्रॉफी 2025 पूर्वी पाकिस्तानातील अनेक स्टेडियममध्ये काम सुरू आहे.

वास्तविक, पाकिस्तानच्या कराची आणि रावळपिंडीच्या स्टेडियममध्ये काम सुरू आहे. चॅम्पियन्स ट्रॉफीपूर्वी या स्टेडियमचे नूतनीकरण करण्यात येत आहे. हे काम पूर्ण होण्यासाठी बराच वेळ लागू शकतो. एका वृत्तवाहिनीच्या बातमीनुसार, या कारणास्तव पाकिस्तान-इंग्लंड मालिका यूएई किंवा श्रीलंकेत हलवली जाऊ शकते. पाकिस्तानने नुकतीच बांगलादेशविरुद्ध कसोटी मालिका खेळली. यामध्ये त्यांना दारुण पराभवाला सामोरे जावे लागले. बांगलादेशने मालिका 2-0 ने जिंकली होती.

असे आहे पाकिस्तान-इंग्लंडचे वेळापत्रक…

पाकिस्तान आणि इंग्लंड यांच्यातील कसोटी मालिकेतील पहिला सामना मुलतान येथे 7 ऑक्टोबरपासून खेळवला जाणार आहे. मालिकेतील दुसरा सामना 15 ऑक्टोबरपासून कराचीमध्ये खेळवला जाणार आहे. कसोटी मालिकेतील तिसरा आणि शेवटचा सामना 24 ऑक्टोबरपासून रावळपिंडीत खेळवला जाणार आहे. जर रावळपिंडी आणि कराचीची स्टेडियम्स वेळेवर तयार झाली नाहीत, तर ही मालिका दुसऱ्या देशात आयोजित केली जाऊ शकते.

New Zealand Test Cricket : किवींचा संघ भारतात दाखल, पण टीम इंडियाशी नाही तर ‘या’ संघाशी होणार सामना; जाणून घ्या काय आहे प्रकरण……

चॅम्पियन्स ट्रॉफीची तयारी करत आहे पाकिस्तान ….

पाकिस्तान चॅम्पियन्स ट्रॉफी 2025 च्या तयारीत व्यस्त आहे. पाकिस्तान क्रिकेट बोर्डाने यासाठी मोठा खर्च केला आहे. त्यांना आयसीसीकडून निधी मिळाला आहे. मात्र या स्पर्धेसाठी भारत पाकिस्तानला जाणार की नाही याबाबत अद्याप स्पष्टपणे काहीही सांगता येणार नाही. मात्र, टीम इंडिया पाकिस्तानला जाण्याची शक्यता फारच कमी आहे.