New Zealand Team Reaches India : न्यूझीलंडचा संघ गुरुवारी भारतात दाखल झाला आहे. टीम साऊदीच्या नेतृत्वाखाली हा संघ ग्रेटर नोएडामध्ये कसोटी सामना खेळणार आहे, पण किवी संघ भारतात येऊन भारतीय संघाविरुद्ध खेळणार नाही हे काय प्रकरण आहे. खरं तर, काही काळापूर्वी भारतीय क्रिकेट नियामक मंडळाने (बीसीसीआय) नोएडा, कानपूर आणि लखनौला अफगाणिस्तान क्रिकेट संघाचे होम ग्राउंड म्हणून घोषित केले आहे.  त्यामुळे न्यूझीलंडचा संघ भारतासोबत नाही तर अफगाणिस्तानसोबत खेळण्यासाठी नोएडा येथे आला आहे.

न्यूझीलंड आणि अफगाणिस्तान (NZ vs AFG Test Match 2024) यांच्यात 9 सप्टेंबरपासून एकमेव कसोटी सामना होणार आहे. न्यूझीलंडने अफगाणिस्तानविरुद्ध खूप मजबूत संघ आणला आहे. कर्णधार टीम साऊदीशिवाय केन विल्यमसन, डेव्हॉन कॉनवे, टॉम लॅथम आणि रचिन रवींद्र हे देखील या मालिकेचा भाग असतील.

अफगाणिस्तान-न्यूझीलंड कसोटी सामना भारतात का…?

साल 2021 मध्ये अफगाणिस्तानमध्ये तालिबान राजवट सुरू झाली. राजकीय अस्थिरता आणि युद्धाच्या भीषणतेचा सामना करणाऱ्या आणि सरावासाठी स्वतःचे मैदानही नसलेल्या देशाच्या संघाने टी-20 विश्वचषकात चांगली कामगिरी केली. क्रिकेटच्या पायाभूत सुविधाही तिथे नाहीत. काबूलमध्ये एकच जागतिक दर्जाचे मैदान आहे. मात्र आतापर्यंत येथे एकही आंतरराष्ट्रीय सामना खेळला गेला नाही. तसेच तालिबान राजवट सुरू झाल्यानंतर महिलांना खेळांमध्ये सहभागी होण्यापासून रोखणारे धोरण तेथे लागू झाले.

या सर्व पार्श्वभूमीवर ऑस्ट्रेलियन क्रिकेट संघाने अफगाणिस्तानविरुद्ध तीनदा खेळण्यास नकार दिला आहे. महिलांना खेळांमध्ये सहभागी होण्यापासून रोखणाऱ्या तालिबानच्या धोरणाविरोधात आवाज उठवण्यासाठी ऑस्ट्रेलियाने ही भूमिका घेतल्याचे जाहीर केले होते. पण त्यानंतर ऑस्ट्रेलियाचा शेजारी देश न्यूझीलंडने हा मुद्दा तूर्तास बाजूला ठेवत अफगाणिस्तानशी खेळण्यास होकार दिला आहे. त्यामुळेच बीसीसीआयनं अफगाणिस्तानला आपले सामने आयोजित करण्यासाठी ग्रेटर नोएडा येथील शहीद विजय सिंह पथिक कॉम्प्लेक्स हे मैदान उपलब्ध करून दिले आहे. आंतरराष्ट्रीय क्रिकेटमध्ये अफगाणिस्तानच्या प्रवासात भारत आणि बीसीसीआयने नेहमीच महत्त्वाची भूमिका बजावली आहे.

Duleep Trophy 2024 : 19 वर्षीय मुशीर खानने रचला इतिहास, पदार्पणातच मोडला सचिन तेंडुलकरचा 33 वर्ष जुना महाविक्रम…

WTC टेबलमध्ये न्यूझीलंड तिसऱ्या स्थानावर 

अफगाणिस्तानविरुद्धचा हा कसोटी सामना न्यूझीलंडला श्रीलंकेविरुद्धच्या कसोटी मालिकेसाठी तयार होण्यास मदत करेल. एकीकडे न्यूझीलंड विरुद्ध अफगाणिस्तान कसोटी सामना 9 सप्टेंबरपासून सुरू होणार आहे. त्यानंतर, किवी संघ 18 सप्टेंबरपासून श्रीलंकेविरुद्ध 2 कसोटी सामन्यांच्या मालिकेला सुरुवात करेल. श्रीलंकेविरुद्धची मालिका जागतिक कसोटी चॅम्पियनशिपचा भाग असेल.

दरम्यान, वर्ल्ड टेस्ट चॅम्पियनशिपच्या टेबलमध्ये न्यूझीलंड तिसऱ्या क्रमांकावर आहे. भारत आणि ऑस्ट्रेलिया अनुक्रमे पहिल्या आणि दुसऱ्या स्थानावर आहेत. न्यूझीलंडला अंतिम फेरी गाठायची असेल, तर श्रीलंकेला कोणत्याही परिस्थितीत हरवावे लागेल. त्यानंतर टीम इंडियासमोर किवी संघाचे आव्हान असेल. भारत विरुद्ध इंग्लंड मालिका 16 ऑक्टोबरपासून सुरू होणार आहे. न्यूझीलंडविरुद्धची ही मालिकाही भारतासाठी खूप महत्त्वाची असेल कारण ती जिंकून टीम इंडियाचा अंतिम फेरीचा मार्ग अधिक सोपा होईल.