नेवासा – वर्षातील शेवटचा शनिवार असल्याने श्रीक्षेत्र शनिशिंगणापूर येथे भाविकांची मोठी गर्दी पाहायला मिळाली. यावेळी आमदार विठ्ठलराव लंघे – पाटील आणि अहमदनगरचे जिल्हाधिकारी डॉ. पंकज आशिया यांनी शनिदेवाचे दर्शन घेऊन जनतेच्या सुख-समृद्धीसाठी प्रार्थना केली. नाशिक विभागीय आयुक्त डॉ. प्रवीण गेडाम यांनी शनैश्वर देवस्थानचा कारभार प्रशासक म्हणून स्वीकारल्याबद्दल आमदार लंघे-पाटील यांच्या हस्ते त्यांचा विशेष सत्कार करण्यात आला. देवस्थानच्या जनसंपर्क कार्यालयात झालेल्या या भेटीदरम्यान भाविकांसाठी आवश्यक सोयी-सुविधा आणि आगामी काळातील पारदर्शक कारभाराबाबत चर्चा करण्यात आली. या प्रसंगी जिल्हा परिषदेचे मुख्य कार्यकारी अधिकारी आनंद भंडारी, उपजिल्हाधिकारी अतुल चोरमारे, प्रांताधिकारी सुधीर पाटील, तहसीलदार संजय बिराजदार आणि गटविकास अधिकारी संजय लखवाल यांची प्रमुख उपस्थिती होती. तसेच भाजप तालुकाध्यक्ष प्रताप चिंधे, सरपंच ललित मोटे, सायराम बानकर, सचिन बानकर, विवेक अंबाडे आणि नवनाथ शिंदे यांसह अनेक मान्यवर उपस्थित होते. या भेटीत प्रशासकीय अधिकाऱ्यांनी देवस्थानच्या सकारात्मक बदलांबाबत आणि भाविकांच्या सुरक्षेबाबत विशेष चर्चा केली. वर्षाच्या शेवटी झालेल्या या महत्त्वपूर्ण दौऱ्यामुळे शनिशिंगणापूरच्या विकासकामांना गती मिळण्याची चिन्हे दिसत आहेत.
