Dipa Karmakar Announced Retirement : भारताची स्टार जिम्नॅस्ट दीपा कर्माकरने (Dipa Karmakar) वयाच्या अवघ्या 31व्या वर्षी जिम्नॅस्टिक खेळाला अलविदा केला आहे. दुखापतीमुळे त्रासलेल्या या स्टार खेळाडूने सोशल मीडियावर निवृत्तीची घोषणा केली आहे. भारतासाठी अनेक पदके जिंकणारी दीपा ऑलिम्पिकमध्ये सहभागी होणारी पहिली महिला जिम्नॅस्ट ठरली होती. पॅरिस ऑलिम्पिकमध्ये स्थान मिळवू न शकल्याने दीपा निराश होती.

पॅरिसमध्ये झालेल्या ऑलिम्पिक 2024 मध्ये दीपा कर्माकर दिसली नाही, कारण ती या गेम्ससाठी पात्र ठरू शकली नव्हती. दुखापतींमुळे दीपा कर्माकरच्या कारकिर्दीवर मोठा परिणाम झाला आणि त्यामुळे ती अनेक मोठ्या स्पर्धांमध्ये सहभागी होऊ शकली नव्हती.

दीपा कर्माकरने सोमवारी 7 ऑक्टोबर रोजी सोशल मीडियावर एक मोठी भावनिक पोस्ट करत अधिकृत निवृत्तीची घोषणा केली आहे.  तिनं म्हटले आहे की, “खूप विचार केल्यानंतर मी जिम्नॅस्टिकमधून निवृत्ती घेण्याचा निर्णय घेतला आहे. हा निर्णय माझ्यासाठी सोपा नव्हता, पण हीच योग्य वेळ आहे. जिम्नॅस्टिक हा माझ्या आयुष्यातील एक मोठा भाग आहे आणि यादरम्यान आलेले चढ-उतार, घडलेल्या गोष्टी आणि प्रत्येक क्षणासाठी मी कृतज्ञ आहे.”

तिनं पुढे लिहिले की, “मला ती पाच वर्षांची दीपा आठवते , जिला सांगितले होते की तिच्या सपाट पायांमुळे ती कधीही जिम्नॅस्टिक करू शकत नाही. त्यानंतर आज मला माझे यश पाहून अभिमान वाटतो. जागतिक स्तरावर भारताचे प्रतिनिधित्व करणे आणि पदक जिंकणं आणि सर्वात महत्त्वाचे म्हणजे रिओ ऑलिम्पिकमध्ये कामगिरी करणे हे माझ्या कारकिर्दीतील सर्वात संस्मरणीय क्षण आहे..”

Gymnast Dipa Karmakar announces retirement pic.twitter.com/VjoK6vajMp

— ANI (@ANI) October 7, 2024

दीपाने (Dipa Karmakar) निवृत्तीचे कारणही सांगितले आहे. आता तिची शारीरिक स्थिती पूर्वीसारखी राहिलेली नाही, असे तिनं पोस्टमध्ये म्हटले आहे. माझा शेवटचा विजय, आशियाई जिम्नॅस्टिक चॅम्पियनशिप ताश्कंद हा एक माझ्यासाठी टर्निंग पॉईंट होता, कारण तेव्हा मला वाटले की, मी माझ्या शरीराला आणखी पुढे ढकलू शकेन, परंतु कधीकधी आपले शरीर आपल्याला सांगते की आता विश्रांती घेण्याची वेळ आली आहे, परंतु हृदय सहमत होण्यास तयार नसते.”

नव्या इनिंगसाठी दिला संदेश 

दीपा कर्माकरनेही या पोस्टमध्ये तिच्या नव्या इनिंगचे संकेत दिले आहेत. तिने लिहिले, “मी जरी निवृत्त होत असले तरी जिम्नॅस्केट्सशी माझा संबंध कधीही तुटणार नाही. माझी इच्छा आहे की मी खेळाला काहीतरी परत देऊ शकेन. कदाचित मार्गदर्शक,प्रशिक्षक किंवा माझ्यासारख्या इतर मुलींना पाठिंबा देऊन.”

मी माझे प्रशिक्षक बिश्वेश्वर नंदी सर आणि सोमा मॅडम यांचे आभार मानू इच्छिते, ज्यांनी मला गेली 25 वर्षे मार्गदर्शन केले आणि माझी सर्वात मोठी ताकद बनले. मला मिळालेल्या पाठिंब्याबद्दल मी त्रिपुरा सरकार, जिम्नॅस्टिक फेडरेशन, स्पोर्ट्स अथॉरिटी ऑफ इंडिया, गोस्पोर्ट्स फाउंडेशन आणि मेराकी स्पोर्ट्स अँड एंटरटेनमेंट यांचे आभार मानू इच्छिते. आणि शेवटी, माझ्या कुटुंबासाठी, जे चांगल्या आणि वाईट काळात नेहमीच माझ्यासोबत राहिले.”

ISSF World Jr. Shooting C’ship 2024 : भारतीय संघानं 50 मी. पिस्तूल स्पर्धेत साधला सुवर्णवेध, पदकतालिकेतही मारली बाजी….

दिपा कर्माकरची कामगिरी….

दीपा कर्माकरने (Dipa Karmakar) जिम्नॅस्टिक्स या खेळात वर्ल्डकपमध्ये दोन पदके जिंकली आहेत. तिने 2018 मध्ये मर्सिनमध्ये व्हॉल्टवर सुवर्णपदक जिंकले. 2018 मध्ये, तिने कॉटबसमध्ये व्हॉल्टमध्ये कांस्यपदक जिंकले. 2014 च्या कॉमनवेल्थ गेम्समध्येही तिने व्हॉल्टमध्ये कांस्यपदक जिंकले होते. आशियाई चॅम्पियनशिपमध्ये तिने दोन पदके जिंकली आहेत. 2024 ताश्कंदमध्ये व्हॉल्टमध्ये सुवर्ण आणि 2015 मध्ये हिरोशिमा येथे झालेल्या चॅम्पियनशिपमध्ये कांस्यपदक जिंकले होते.

ऑलिम्पिकमध्ये रचला होता इतिहास…. 

साल 2016 च्या रिओ ऑलिम्पिकमध्ये भारताला केवळ दोनच पदके मिळाली असली तरी या खेळांमध्ये भारताला एक नवा स्टार मिळाला. पहिल्यांदाच जिम्नॅस्टिक्स या खेळात देशाला भारतीयाकडून पदकाच्या अपेक्षा होत्या. दीपा कर्माकर देशासाठी पदक आणू शकली नाही पण ती घराघरात लोकप्रिय झाली होती.

दीपा कर्माकरच्या (Dipa Karmakar) कारकिर्दीतील एक संस्मरणीय क्षण म्हणजे जेव्हा तिने 2016 च्या रिओ ऑलिम्पिकमध्ये तिच्या चमकदार कामगिरीसह अंतिम व्हॉल्ट स्पर्धेसाठी पात्रता मिळवली होती आणि अशी कामगिरी करणारी ती पहिली भारतीय महिला जिम्नॅस्ट ठरली होती. मात्र, या स्पर्धेत तिला पदक जिंकता आले नसले तरी तिने चौथे स्थान पटकावत भारतासाठी इतिहास रचला होता.

Shanghai Masters 2024 : सिनर,अल्काराज अन् मेदवेदेवची आगेकूच कायम….

मिळाले आहेत अनेक सन्मान…

दिपा कर्माकरला तिच्या उत्कृष्ट कारकिर्दीत अनेक प्रतिष्ठित पुरस्कार आणि सन्मानांनी सन्मानित करण्यात आले आहे. यामध्ये भारताचा चौथा सर्वोच्च नागरी पुरस्कार पद्मश्री, क्रीडा क्षेत्रातील उत्कृष्ट कामगिरीसाठी अर्जुन पुरस्कार आणि देशातील सर्वोच्च क्रीडा सन्मान मेजर ध्यानचंद खेलरत्न पुरस्कार यांचा समावेश आहे. याशिवाय फोर्ब्सच्या 30 अंडर 30 सुपर अचिव्हर्सच्या यादीत तिचा समावेश करण्यात आला होता.