म्लाबाचा आक्षेपार्ह वर्तन आणि दंड –

भारतीय डावातील 17व्या षटकात म्लाबाने हरलीन देओलला बाद केल्यानंतर तिला ‘गुडबाय’चा आक्षेपार्ह हावभाव केला. यामुळे 24 वर्षीय डावखुऱ्या फिरकीपटू म्लाबाला आयसीसी आचारसंहितेच्या अनुच्छेद 2.5 चा भंग केल्याचे आढळले, जे आंतरराष्ट्रीय सामन्यात खेळाडूच्या बाद होण्यावर अपमानास्पद भाषा, वर्तन किंवा आक्रमक हावभावांशी संबंधित आहे. म्लाबाला औपचारिक फटकार लगावण्यात आली असून तिच्या अनुशासनात्मक रेकॉर्डमध्ये एक डिमेरिट गुण जोडण्यात आला आहे. गेल्या 24 महिन्यांतील हा तिचा पहिला अपराध आहे.

आयसीसीच्या नियमानुसार, लेव्हल 1 च्या उल्लंघनासाठी किमान दंड म्हणून औपचारिक फटकार, कमाल 50% मॅच फीचा दंड आणि परिस्थितीच्या गंभीरतेनुसार एक किंवा दोन डिमेरिट गुण असू शकतात. आयसीसीच्या निवेदनात म्हटले आहे, “म्लाबाने तिचा अपराध कबूल केला असून मॅच रेफरीने सुचवलेला दंड स्वीकारला आहे. त्यामुळे औपचारिक सुनावणीची गरज पडली नाही.”

हेही वाचा – Rohit Sharma : कर्णधारपद गमावल्यानंतर रोहित शर्माच्या पगारात कपात? BCCI चा काय आहे नियम? जाणून घ्या

सामन्याचा थरार आणि दक्षिण आफ्रिकेचा विजय –

या सामन्यात भारताने प्रथम फलंदाजी करताना 251 धावा केल्या होत्या. मात्र, या विश्वचषकात भारताने आतापर्यंतच्या सर्व सामन्यांमध्ये पहिल्या 5-6 गडी लवकर गमावले आहेत. या सामन्यातही दक्षिण आफ्रिकेच्या डावखुऱ्या फिरकीपटूंनी भारताला सुरुवातीला धक्के दिले. क्लोई ट्रायऑन (32 धावांत 3 गडी) आणि नॉनकुलुलेको म्लाबा (46 धावांत 2 गडी) यांनी भारताचा डाव 6 बाद 102 धावांवर आणला. परंतु, ऋचा घोष (94 धावा, 77 चेंडू, 11 चौकार, 4 षटकार) आणि स्नेह राणा (33 धावा, 24 चेंडू, 6 चौकार) यांनी आठव्या गड्यासाठी 53 चेंडूत 88 धावांची झटपट भागीदारी करत भारताला 251 धावांपर्यंत पोहोचवले. शेवटच्या 9 षटकांत भारताने 97 धावा जोडल्या.

हेही वाचा – Rohit Sharma : ‘ए सोड त्याला…’, लहान चाहत्यासाठी रोहितनं सुरक्षारक्षकाला सुनावलं! पाहा हिटमॅनचा राग अन् प्रेम

प्रत्युत्तरात 252 धावांच्या लक्ष्याचा पाठलाग करताना दक्षिण आफ्रिकेची नादिन डि क्लर्कने कारकिर्दीतील सर्वोत्तम खेळी करत 54 चेंडूत नाबाद 84 धावा (8 चौकार, 5 षटकार) काढल्या. तिने क्लोई ट्रायऑन (49 धावा) सोबत सातव्या गड्यासाठी 69 धावांची भागीदारी करत दक्षिण आफ्रिकेला 48.5 षटकांत 7 बाद 252 धावांपर्यंत पोहोचवून विजय मिळवून दिला.