Nitish Kumar – बिहारचे मुख्यमंत्री नितीश कुमार यांनी राज्यातील विधानसभा निवडणुकीपूर्वी मोठा मास्टर स्ट्रोक खेळला आहे आणि वृद्ध, अपंग आणि विधवा महिलांना देण्यात येणारे मासिक पेन्शन वाढवण्याची घोषणा केली आहे.

नितीश कुमार यांनी मासिक पेन्शन ४०० रुपयांवरून १,१०० रुपये करण्याची घोषणा केली. हा निर्णय जुलैपासून लागू होईल. या निर्णयाचा फायदा राज्याच्या सामाजिक सुरक्षा पेन्शन योजनेअंतर्गत एक कोटी नऊ लाख ६९ हजार २५५ लाभार्थ्यांना होईल.

मासिक पेन्शनमध्ये वाढ जाहीर करताना नितीश कुमार म्हणाले, सामाजिक सुरक्षा पेन्शन योजनेअंतर्गत, आता सर्व वृद्ध, दिव्यांग आणि विधवा महिलांना दरमहा ४०० रुपयांऐवजी जुलै महिन्यापासून ११०० रुपये पेन्शन मिळेल.

ही रक्कम महिन्याच्या १० तारखेला सर्व लाभार्थ्यांच्या खात्यात पाठवली जाईल. याची खात्री केली जाईल. वृद्ध हे समाजाचा एक मौल्यवान भाग आहेत आणि त्यांना सन्माननीय जीवन मिळवून देणे हे आमचे सर्वोच्च प्राधान्य आहे. राज्य सरकार या दिशेने आपले प्रयत्न सुरू ठेवेल.

या वर्षी बिहारमध्ये होणाऱ्या विधानसभा निवडणुकीची तयारी सर्व राजकीय पक्षांनी सुरू केली आहे. या काळात राजकीय पक्षांच्या बैठकाही सुरू झाल्या आहेत. ज्यामध्ये सध्या निवडणूक जिंकण्याची रणनीती आखली जात आहे.

त्याच वेळी, अलीकडेच आम आदमी पक्षाने बिहार विधानसभा निवडणुकीत सर्व २४३ जागा लढवण्याची घोषणा केली आहे. येत्या काही दिवसांत पक्षाचे वरिष्ठ नेते बिहारमधील अनेक शहरांमध्ये पदयात्रा देखील काढतील.