लाखणगाव : येथील वनक्षेत्रातील फॉरेस्ट कंपार्टमेंट क्रमांक 252मध्ये विनापरवाना प्रवेश करून जेसीबीच्या सहाय्याने मुरूम उत्खनन सुरू असल्याचे वन विभागाच्या गस्ती पथकाने उघडकीस आणले. पथकाने कारवाई करत जेसीबी ताब्यात घेतली; मात्र चालक घटनास्थळावरून फरार झाला.

वन विभागाचे पथक मंगळवारी (दि. 25) पहाटे सुमारे 1.15 वाजता वनक्षेत्रात गस्त घालत असताना जेसीबीच्या सहाय्याने मुरूम उत्खनन सुरू असल्याचे निदर्शनास आले. पथकाने तत्काळ घटनास्थळी धाव घेत जेसीबी ताब्यात घेतली. घटनास्थळी पंचनामा करून जप्त करण्यात आलेली जेसीबी वनपरिक्षेत्र कार्यालय, मंचर येथे सुरक्षित ठेवण्यात आली आहे. प्राथमिक तपासात संबंधित जेसीबी राजेश रमेश गडकर (रा. पारगाव, ता. आंबेगाव) यांच्या मालकीची असल्याचे निष्पन्न झाले आहे. वनक्षेत्रातील मुरूमाचे विनापरवाना उत्खनन करून त्याची वाहतूक व विक्री करण्याचा प्रयत्न झाल्याच्या पार्श्वभूमीवर संबंधितांविरुद्ध वन गुन्हा नोंद करण्यात आला असून, पुढील तपास वन विभागाकडून सुरू आहे.

ही कारवाई सहायक वनसंरक्षक, जुन्नर अमृत शिंदे आणि वनपरिक्षेत्र अधिकारी, मंचर विकास भोसले यांच्या मार्गदर्शनाखाली करण्यात आली. वनपाल, धामणी नीलम चव्हाण, वनरक्षक, लाखनगाव पूजा कांबळे तसेच बिबट शीघ्र कृती दलातील अशोक जाधव व रामदास वळसे यांच्या पथकाने कारवाईत सहभाग घेतला. वनक्षेत्रातील अवैध उत्खनन, अतिक्रमण आणि विनापरवाना वाहतुकीविरुद्ध यापुढेही कठोर कारवाई करण्यात येणार असल्याचे वन विभागाने स्पष्ट केले आहे.