आळेफाटा : आळेफाटा येथील श्री. अनंतराव कणसे होमिओपॅथी वैद्यकीय महाविद्यालय व हॉस्पिटल च्या पटांगणात एका महाविद्यालयीन विद्यार्थ्याला मारहाण, शिवीगाळ व दमदाटी करून रॅगिंग केल्याप्रकरणी आळेफाटा पोलिस ठाण्यात तीन विद्यार्थ्यांविरोधात गुन्हा दाखल करण्यात आला आहे.

ग्रामीण भागातील जुन्नर तालुक्यात रॅगिंगसारख्या गंभीर प्रकाराबाबत समोर आलेली ही घटना महाविद्यालयीन परिसरात विद्यार्थ्यांच्या सुरक्षिततेचा आणि रॅगिंगविरोधी जनजागृतीचा मुद्दा अधोरेखित करणारी ठरली आहे. आळेफाटा पोलिसांनी दिलेल्या माहितीनुसार, फिर्यादी विद्यार्थी महाविद्यालयात शिक्षण घेत असून, १४ ऑगस्ट रोजी सायंकाळी साडेपाचच्या सुमारास महाविद्यालयाच्या पटांगणात ही घटना घडल्याचे तक्रारीत नमूद करण्यात आले आहे.

फिर्यादीच्या म्हणण्यानुसार, महाविद्यालयातील चौथ्या वर्षात शिकणारे स्वागत पाडोळे, विवेक पाटील आणि राहुल भाबड यांनी संगनमत करून सर्व विद्यार्थ्यांसमोर आपण ज्युनिअर असल्याने आपला अपमान होईल,याची जाणीव असतानाही हाताने तसेच लाथाबुक्क्यांनी मारहाण केली. शिवीगाळ व दमदाटी करून रॅगिंग केल्याचा आरोप तक्रारीत करण्यात आला आहे.

या तक्रारीवरून आळेफाटा पोलीस ठाण्यात भारतीय न्याय संहितेतील कलम ११५(२), ३५२, ३५१(२), ३५१(३) तसेच महाराष्ट्र छळवाद प्रतिबंध अधिनियम १९९९चे कलम ४ अन्वये गुन्हा दाखल करण्यात आला आहे. या प्रकरणातील आरोपींना अद्याप अटक करण्यात आलेली नसून, प्रतिबंधात्मक कारवाई करण्याची तजवीज ठेवण्यात आल्याचे पोलीस नोंदीत नमूद आहे. पुढील तपास पोलीस निरीक्षक विश्वास जाधव यांच्या मार्गदर्शनाखाली पोलीस हवालदार गिरी करीत आहेत.

दरम्यान रॅगिंग हा विद्यार्थ्यांच्या मानसिक आणि शारीरिक सुरक्षिततेशी संबंधित गंभीर विषय आहे. ग्रामीण भागातील महाविद्यालयांमध्येही अशा प्रकारांना थारा मिळू नये, यासाठी विद्यार्थी, पालक, शिक्षक आणि महाविद्यालय प्रशासनाने जागरूक राहणे गरजेचे आहे. महाविद्यालयीन जीवन हे शिक्षण,मैत्री आणि व्यक्तिमत्त्व विकासासाठी असते; भीती, मारहाण किंवा अपमानासाठी नव्हे. त्यामुळे रॅगिंगसारख्या प्रकारांना वेळीच आळा घालून विद्यार्थ्यांना सुरक्षित आणि भयमुक्त शैक्षणिक वातावरण मिळणे आवश्यक आहे.