शिरूर :  सरदवाडी गावच्या हद्दीत करडे घाटावर मोकळ्या जागेत विनापरवाना गावठी बनावटीचे पिस्तुल आणि जिवंत काडतूस बाळगणाऱ्या २३ वर्षीय तरुणाला शिरूर पोलिसांनी जेरबंद केले.

गणेश परमेश्वर वेरूळकर (वय २३, सध्या रा. यश ईन चौक, कारेगाव, ता. शिरूर; मूळ रा. आसलगाव बाजार, ता. जळगाव जामोद, जि. बुलढाणा) असे अटक करण्यात आलेल्या आरोपीचे नाव आहे. न्यायालयात त्याला हजर केला असता न्यायालयाने त्याला दोन दिवसांची पोलिस कोठडी सुनावली आहे.

शिरूर पोलिसांनी दिलेल्या माहितीनुसार, दि. २२ ऑगस्ट रोजी सायंकाळी सुमारे ४.५० वाजण्याच्या सुमारास सरदवाडी गावच्या हद्दीत करडे घाट चढून गेल्यानंतरच्या मोकळ्या जागेत गणेश वेरूळकर हा संशयास्पदरीत्या आढळून आला. त्याची झडती घेतली असता त्याच्याकडे गावठी बनावटीचे पिस्तुल आणि एक जिवंत काडतूस आढळून आले.

पोलिसांनी जप्त केलेल्या मुद्देमालामध्ये सुमारे ३० हजार रुपये किमतीचे गावठी बनावटीचे पिस्तुल तसेच १ हजार रुपये किमतीचे ७.६५ कॅलिबरचे काडतूस असा एकूण ३१ हजार रुपयांचा मुद्देमाल आहे. पिस्तुलाच्या बॅरलची लांबी सुमारे १० सेंटीमीटर असून त्याचा व्यास ९ मिमी असल्याचे पोलिसांनी नमूद केले आहे.

या प्रकरणी शिरूर पोलीस ठाण्यात पोलीस कॉन्स्टेबल विजय गजानन शिंदे यांनी फिर्याद दिली आहे. आरोपीविरुद्ध शस्त्र अधिनियम १९५९ मधील कलम ३ व २५ अन्वये गुन्हा दाखल करण्यात आला आहे.

या गुन्ह्याचा तपास पोलीस उपनिरीक्षक शुभम चव्हाण करीत असून, शिरूर पोलीस ठाण्याचे पोलीस निरीक्षक विनोद पाटील यांच्या मार्गदर्शनाखाली पुढील तपास सुरू आहे.

आरोपीकडे हे पिस्तुल नेमके कोठून आले, ते कोणाकडून मिळाले, तसेच त्याचा वापर कोणत्या कारणासाठी केला जाणार होता, याचा तपास पोलिसांकडून करण्यात येत आहे. या तपासातून शस्त्राच्या पुरवठ्याची साखळी समोर येते का, याकडे लक्ष लागले आहे.

Drishyam 3 : प्रतिक्षा संपली! ‘दृश्यम 3’ची रिलीज डेट जाहीर; तारखेसोबत खास कनेक्शन