पाथर्डी – तू मला ओळखत नाही, मी कोण आहे? ते तुला सांगतो, मी सतीश ऊर्फ खोक्या भोसले (शिरुर कासार ) याचा साडू आहे. तुला या जमिनीमध्ये यायचे असेल तर तुला एक कोटीची किंमत मोजावी लागेल, असे म्हणून खंडणी मागणारा खोक्याचा साडू प्रशांत चव्हाणच्या विरोधात पाथर्डी पोलीस ठाण्यात आजिनाथ खेडकर यांच्या फिर्यादीवरून गुन्हा दाखल करण्यात आला.

बीड जिल्ह्यामध्ये सतीश भोसले उर्फ खोक्याचे एक एक प्रताप समोर येत आहे. पण आता त्याचा साडूही काही कमी नसल्याचं आता उघड झालं आहे. खोक्याच्या या साडूने फिर्यादीचीच जमीन असलेल्या जागेवर ताबा मिळवून देण्यासाठी तब्बल एक कोटी रुपयांची खंडणी मागितली.

याप्रकरणी खोक्याचा साडू प्रशांत चव्हाणच्या विरोधात एक कोटीची खंडणीचा गुन्हा दाखल झाला आहे. सतीश भोसलेचा साडू प्रशांत चव्हाण उर्फ गब्या याने आणि त्याच्या साथीदारांनी पाथर्डी शहरागत असलेल्या जमिनीवर ताबा घेतला आहे. तुला या जमिनीमध्ये यायचे असेल तर एक कोटी रुपय द्यावे लागतील, अशी खंडणीची मागणी चव्हाण याने केली.

अजिनाथ खेडकर आणि विष्णू ढाकणे यांनी पाथर्डी शहरात शेवगाव रोडवरील गट नंबर 77/1 पैकी 23 गुंठे जमीन घेतली होती. जमीन पाहणी करण्यासाठी तिथे गेले. पारधी समाजाच्या लोकांनी गट नंबरच्या रोडच्या साईटला अतिक्रमण केल्याचे दिसून आले. त्यावेळेस त्यांच्यात बाचाबाची झाली. प्रशांत म्हणाला, मला माझ्यासोबत काम करणाऱ्या इतर लोकांनाही पैशाचे वाटप करावे लागते. त्यामुळे मला तुम्ही विकत घेतलेल्या जमिनीमध्ये ताबा घेण्यासाठी एक कोटी रुपये द्या.

पैसे दिल्यानंतर मी तुम्हाला तुमच्या जमिनीचा सर्व क्लेअर करून ताबा देतो. खेडकर यांच्या फिर्यादीवरून पैसे मागणारे प्रशांत अरफान चव्हाण (गब्या), शिल्पा प्रशांत चव्हाण, सुनिता संजय भोसले, इंदुबाई आबाशा चव्हाण, शिल्पा अमोल काळे, संतोष आब्बास चव्हाण, काजल भाऊरस काळे, अनिता निस्तान काळे (सर्व रा. निपानी जळगाव ता. पाथर्डी) याच्याविरुध्द पाथर्डी पोलीस ठाण्यात गुन्हा दाखल करण्यात आला.