Satish Bhosale Khokya : बीड जिल्ह्यातील गुन्हेगारी मस्साजोग गावाचे सरपंच संतोष देशमुख यांच्या हत्येनंतर अधोरिखेत झाली. या घटनेनंतर जिल्ह्यातून अनेक गंभीर स्वरुपाच्या गुन्हेगारीच्या घटना घडल्या. देशमुख यांच्या हत्याप्रकरणावर सातत्याने बोलणारे भाजप आमदार सुरेश धस यांचा निकिटवर्तीय असलेला सतीश उर्फ खोक्या भोसले याचे कारनामे समोर आले होते.

एका व्यक्तीला बॅटने मारहाण केल्याचा आरोप खोक्यावर ठेवण्यात आला असून, त्याचे अनेक व्हिडीओ सोशल मीडियावर व्हायरल झाले होते. त्यानंतर खोक्या उर्फ सतीश भोसले याने पलायन केले होते. बीड पोलिसांनी त्याचा शोध घेत त्याला अटक केली. खोक्या कोठडीत असून त्याच्या कुटुंबीयांनी पोलीस आणि झापेवाडीच्या काही ग्रामस्थांवर गंभीर आरोप केले आहेत.

• वन विभागाने पक्षपात करून आमचे घर पाडले. नंतर दुसऱ्या दिवशी गावगुंडानी आमच्या घराचं साहित्य जाळून टाकलं. यावेळी आमचे पाळीव प्राणीही जाळून टाकण्यात आले.
• पारधी वस्तीतील नागरिकांनी गावातील काही लोकांच्या शेतातील डुकरांचा शिकार करून मारण्यास नकार दिला, त्यामुळे वाद झाला. गावातील त्या दबंग लोकांनी बळजबरीने काही पारध्याना शेतात नेले. दुसऱ्या दिवशी डुकरांच्या शिकारीसाठी बळजबरीने लावलेले जाळे काढताना एका अल्पवयीन मुलीची छेडखानी करण्यात आली. लहान मुलांना मारहाण करण्यात आली आणि त्यामुळे तो वाद आणखी वाढलं.
• त्या मारहाणीत जखमी झालेल्या काही गावकऱ्यांना खुद्द सतीश भोसलेने आपल्या गाडीत रुग्णालयात नेऊन उपचार केले होते.
•  अल्पवयीन मुलीने पोलीस स्टेशन गाठून छेडखानीची तक्रार दिली. तेव्हा शिरूर पोलीस स्टेशनमध्ये काही गावकऱ्यांच्या विरोधात विनयभंगाचा गुन्हा दाखल झाला आणि त्यामुळे गावकऱ्यांचा रोष सतीश भोसले आणि त्याच्या कुटुंबीयांवर वाढला.
•  पारधी समाजासह मागासवर्गीयांची एकूण 13 घरे त्या ठिकाणी जाळण्यात आली.
• पोलिसांनी आमच्या विनयभंग व मारहाणीच्या तक्रारीवर आजवर कुठलीही ठोस कारवाई केलेली नाही.