school roof collapse – राजस्थानमधील झालावाड जिल्ह्यातील पिपलोडी गावात शुक्रवारी झालेल्या दुःखद शाळेच्या दुर्घटनेनंतर, गावकरी आणि मृत मुलांच्या कुटुंबियांच्या तक्रारीवरून मुख्याध्यापक आणि चार शिक्षकांविरुद्ध निष्काळजीपणाचा गुन्हा दाखल करण्यात आला आहे. या दुर्घटनेत सरकारी उच्च प्राथमिक शाळेत वर्गाची भिंत आणि छत कोसळल्याने सात मुलांचा मृत्यू झाला आणि २१ जण जखमी झाले. या घटनेने संपूर्ण राज्य हादरले.

झालावाड पोलिसांनी दिलेल्या माहितीनुसार, अद्याप एफआयआरमध्ये कोणाचेही नाव स्पष्टपणे लिहिलेले नाही. पण तपास सुरू आहे, त्यामुळे कोणालाही ताब्यात घेतले गेलेले नाही. हा गुन्हा डांगीपुरा पोलिस ठाण्यात नोंदवण्यात आला आहे. भारतीय दंड संहितेच्या कलम १०६ आणि २१५ अंतर्गत गुन्हा दाखल करण्यात आला आहे. निष्काळजीपणामुळे झालेल्या मृत्यूची या कलमांखाली चौकशी केली जाते.

शाळा व्यवस्थापनाने पोलिसांना सांगितले की त्यांना इमारतीत कोणतेही गंभीर बांधकाम दोष किंवा धोक्याचे चिन्ह यापूर्वी आढळले नव्हते. तथापि, वाचलेल्या विद्यार्थ्यांनी सांगितले की, अपघाताच्या काही तास आधी वर्गात भिंतींवरून लहान दगड पडत होते. त्याबद्दल विद्यार्थ्यांनी शिक्षकांना सतर्क केले होते. परंतु शिक्षकांनी त्यांना शांत बसण्यास सांगितले.

मग इशारा देऊनही कारवाई का केली गेली नाही असा प्रश्न निर्माण होतो. घटनेचे गांभीर्य लक्षात घेता, जिल्हाधिकाऱ्यांनी पाच सदस्यांची चौकशी समिती स्थापन केली आहे. त्याचे नेतृत्व जिल्हा परिषदेचे मुख्य कार्यकारी अधिकारी करतील. ही चौकशी समिती अपघातामागील सर्व तथ्यांची सखोल चौकशी करेल.

काय म्हणाले शिक्षणाधिकारी?
मुख्य जिल्हा शिक्षण अधिकारी राम सिंह मीणा म्हणाले की, पीपलोडी शाळेतील विद्यार्थ्यांना सोमवारपासून जवळच्या सरकारी शाळेत हलवले जाईल. तसेच, जिल्ह्यातील जीर्ण वर्गखोल्या सध्यासाठी सील करण्यात आल्या आहेत.

ही दुर्घटना केवळ प्रशासकीय त्रुटी दर्शवत नाही तर सरकारी शाळांच्या इमारती अजूनही मुलांसाठी सुरक्षित आहेत का असा प्रश्नही उपस्थित करते. जनतेमध्ये संताप आहे आणि पीडित कुटुंबे न्यायाची मागणी करत आहेत.