प्रभात वृत्तसेवा
पुणे – टेंभूर्णी-सोलापूर बायपास मार्गावर पडलेल्या खड्ड्यांचा मनस्ताप शुक्रवारी विधानपरिषद उपसभापती डाॅ. नीलम गोऱ्हे यांनाही सोसावा लागला. उपसभापतींच्या वाहनांचा ताफा या बायपास मार्गावरून जात असताना डाॅ. गोऱ्हे यांच्या वाहनाचे दोन्ही टायर फुटले. यावेळी चालकाने प्रसंगावधान दाखवत गाडीच्या वेगावर नियंत्रण मिळविल्यामुळे मोठा अपघात टळला. धक्कादायक बाब म्हणजे सर्व परिस्थिती व्यवस्थित झाल्यावर ताफा पुण्याच्या दिशेने निघाल्यावर काही अंतरावरच पुन्हा ताफ्यातील अन्य दोन वाहनांचे टायर फुटल्याच्या घटना घडल्या.

त्यामुळे घटनेचे गांभीर्य लक्षात घेऊन डाॅ. नीलम गोऱ्हे यांनी तात्काळ जिल्ह्यातील संबंधित विभागातील अधिकाऱ्यांशी संपर्क साधून तात्काळ खड्डे बुजविण्याचे निर्देश दिले. या मार्गावर दररोज मोठ्या संख्येने वाहने धावतात. त्यामुळे नागरिकांचे आणि प्रवाशांचे जीव धोक्यात येऊ नये म्हणून तात्काळ ही कारवाई करण्यात यावी असे आदेशही त्यांनी दिले. दरम्यान, या घटनेत डाॅ. गोऱ्हे यांच्यासह सर्वजण सुखरूप असल्याचे उपसभापती कार्यालयाचे स्वीय सहाय्यक योगेश जाधव यांनी सांगितले.