प्रभात वृत्तसेवा रांजणगाव गणपती – राष्ट्रवादी काँग्रेसच्या वतीने आंबेगाव-शिरूर विधानसभा मतदारसंघात कार्यकर्ता मेळावा शुक्रवार (दि.१७) रोजी सकाळी ११ वाजता कवठे यमाई (अष्टविनायक रस्ता) येथे माहेश्वरी मंगल कार्यालयात आयोजित केल्याची माहिती आंबेगाव- शिरूर राष्ट्रवादी काँग्रेस पक्षाचे तालुकाध्यक्ष मानसिंग पाचुंदकर पाटील यांनी दिली. दरम्यान, या मेळाव्याकडे आंबेगाव- शिरूर तालुक्याचे लक्ष लागून राहिले आहे.मेळाव्यास राष्ट्रवादी काँग्रेसचे ज्येष्ठ नेते व माजी गृहमंत्री दिलीप वळसे पाटील, माजी खासदार व म्हाडाचे अध्यक्ष शिवाजीराव आढळराव पाटील, आमदार माजी पोपटराव गावडे हे प्रमुख मार्गदर्शक म्हणून उपस्थित राहणार आहेत. कार्यकर्ता मेळाव्याचे आयोजन आंबेगाव-शिरूर विधानसभा मतदारसंघ राष्ट्रवादी काँग्रेस पक्षाच्या वतीने करण्यात आले आहे. मेळाव्याद्वारे पक्ष संघटन बळकट करणे, आगामी निवडणुकांच्या पार्श्वभूमीवर कार्यकर्त्यांना मार्गदर्शन करणे व जनसंपर्क वाढविणे या उद्देशाने हा कार्यक्रम होणार आहे. मेळाव्याच्या तयारीसाठी पक्षाचे कार्यकर्ते, पदाधिकारी व स्थानिक नेते मोठ्या जोमाने तयारी करीत असून शिरूर तालुक्यातील सर्व विभागातून शेकडो कार्यकर्ते उपस्थित राहणार असल्याचे आयोजकांनी सांगितले. आंबेगाव मतदारसंघात झेडपीचीच हवा.. जिल्हा परिषद, पंचायत समितीच्या गट- गणाचे आरक्षण जाहीर झाल्यानंतर आंबेगाव मतदारसंघात राजकीय हवा पालटू लागली आहे. आंबेगाव- शिरूर राष्ट्रवादी काँग्रेस पक्षाचे तालुकाध्यक्ष मानसिंग पाचुंदकर पाटील यांनी मतदारसंघात राष्ट्रवादीच्या कार्यकर्त्यांना बळ देण्यासाठी मेळावा घेतला आहे. निवडणूक जाहीर होण्यापूर्वीच पाचुंदकर यांनी संघटत्नामक बांधणीवर लक्ष केंद्रीत केले आहे. त्यात माजी मंत्री वळसे पाटील, म्हाडाचे अध्यक्ष आढळराव पाटील, माजी आमदार गावडे यांची रसद कार्यकर्त्यांना बळ देणारी ठरणार आहे.
